ممبئی، پریس ریلیز،ہماراسماج: آج یہاں مسجد حضرت بلال ماما چوک جالنہ میں دینی تعلیمی بورڈ جمعیۃ علماء ضلع جالنہ کے زیر اہتمام یک روزہ تربیتی ورکشاپ و عظیم الشان اجلاس عام بصدارت حضرت مولانا حافظ محمد ندیم صدیقی( صدر جمعیۃ علماء مہاراشٹر )منعقد ہوا، جس میں ضلع بھر سے اراکینِ جمعیۃ و عوام الناس نے شرکت کی۔مولانا محمد حسن ملی صاحب ( صدر جمعیۃ علماء ضلع جالنہ ) نے تمہیدی خطاب کرتے ہوئے مہمانان کرام اور شرکاء اجلاس کا شکریہ ادا کیا۔ مفتی عبد الرزاق ملی صاحب ( صدر جمعیۃ علماء اورنگ آباد ) نے کہا کہ ہمارے اکابرین اگر وقت پر اپنی ذ مہ داری ادا نہ کرتے تو شاید آج ہمارے نہ مدارس ہوتے اور نہ مساجد نہ ہمارے چہروں پر داڑھیا ں اور ٹو پیاں نظر آتیں ۔ مفتی عبد الرحمن اشرفی صاحب ( جنرل سکریٹری جمعیۃ علماء مرہٹواڑہ ) نے جمعیۃ علماء کا طریقہ کار اور اسلامی تعلیمات کے عنوان پر روشنی ڈالتے ہوئے فرمایا کہ جمعیۃ کے اجتماعی کاموں میں میٹنگ اور ماہانہ مشورہ بہت اہم کام ہے اس سے جماعت کو تقویت حاصل ہوتی ہے اور نئے نیے تقاضہ سامنے آتے ہیں اور باہم مشورہ سے کاموں کی منصوبہ بندی کرنے سے مقاصد کو حاصل کرنے میں کامیابی ملتی ہے۔ اس موقع پر صدر اجلاس مولانا حافظ محمد ندیم صدیقی نےملک کے موجودہ حالات پر تشویش کا اظہار کرتے ہوئے فرمایا کہ اس وقت معاشی سماجی و سیاسی اعتبار سے مسلمانوں کو حاشیے پر دھکیلنے کی منظم کوششیں کی جا رہی ہیں، جن کا مقابلہ صرف اتحاد اور تعلیم کے ذریعے ہی ممکن ہے۔ انہوں نے کارکنان کو نصیحت کی کہ وہ اپنی صفوں میں نظم و ضبط پیدا کریں اور عوامی سطح پر خدمتِ خلق کے کاموں کو تیز کریں، کیونکہ جمعیۃ علماءکا بنیادی مقصد ہی انسانیت کی خدمت اور دینِ اسلام کی صحیح ترجمانی کرنا ہے،انہوں نے اپنے بیان میں ارتداد کی روک تھام کے لیے دیہاتوں پر توجہ دینے کی تاکید کی۔مولانا محمد ابراہیم قاسمی صاحب ( جنرل سکریٹری جمعیۃ علماء مہا راشٹر ) نے اپنے تفصیلی خطاب میں فرمایا کہ ہم جمعیۃ علماء کے پلیٹ فارم سے خدمت خلق کا کام شہرت یا سیاسی فائدے کے لئے نہیں کر رہے ہیں بلکہ ہم اراکین رفاہی کام اس لئے کر رہے ہیں کہ یہ کام ہمارے نبی ﷺ نے کیا ہے ۔ قاری شمس الحق قاسمی صاحب ( صدر جمعیۃ علماء مرہٹواڑہ ) نے خطاب کرتے ہوئے موجودہ دور میں شعبہ اصلاح معاشرہ و سیرۃ النبیﷺ کی ضرورت و اہمیت اور طریقہ کار پر روشنی ڈالی۔اجلاس عام کے مقرر خصوصی قاری رشید احمد صاحب اجمیری نقشبندی ( شیخ الحدیث دار العلوم اشرفیہ راندیر سورت ) نے خطاب کرتے ہوئے فرمایا کہ اسلام میں تزکیۂ نفس کو بڑی اہمیت حاصل ہے کیونکہ انسان کی اصل کامیابی ظاہری ترقی کے ساتھ ساتھ باطنی پاکیزگی میں مضمر ہے۔ قرآنِ مجید میں بار بار اس بات پر زور دیا گیا ہے کہ وہی شخص کامیاب ہے جو اپنے نفس کو پاک کرے۔اجلاس کا آغاز مولانا عبد الرشید صاحب اور حافظ عبدالعلیم صاحب کی تلاوت قرآن کریم اور حافظ محمد شاہد صاحب کے نعتیہ کلام سے ہوا ،قاری محمد صابر صاحب منٹھا اور حافظ اعزاز الدین فاروقی نے جمعیۃ کا ترانہ پیش کیا مفتی محمد رمضان صاحب ندوی نے تحریک صدارت پیش کی مفتی سہیل صاحب حافظ اعزاز الدین مفتی عرفان نے تائید پیش کی ،مفتی فہیم اشاعتی صاحب ( صدر جمعیۃ علماء شہر جالنہ ) نے تربیتی کیمپ اور اجلاس کی نظامت کے فرائض انجام دیئے، اجلاس کو کامیاب بنانے میں جمعیۃ علماء شہر و ضلع جالنہ کےمقامی کارکنان بالخصوص شہر میں موجود ضلع جمعیۃ کے ذمہ داران شہر جمعیۃ اور قدیم جالنہ ونیا جالنہ یونٹوں نے بے انتہا ءمحنت کرکے اجلاس کے کامیابی کی بنیاد رکھی۔
