مودی حکومت آئینی اداروں کو کمزور کر رہی ہے

نئی دہلی، ایجنسیاں: کانگریس نے ایک بار پھر مودی حکومت کو گھیرنے کی کوششیں شروع کر دی ہیں۔ منگل کو کانگریس نے اعلان کیا کہ بدھ سے شروع ہونے والے پارلیمنٹ کے بجٹ اجلاس میں مودی حکومت کی خارجہ پالیسی، امریکی ٹیرف، ڈالر کے مقابلے روپے کی گراوٹ، منریگا کو ختم کرنے اور مفاد عامہ کے کئی دیگر مسائل اٹھائے جائیں گے۔ حکومت کی طرف سے بلائی گئی آل پارٹی میٹنگ کے بعد راجیہ سبھا میں کانگریس کے ڈپٹی لیڈر پرمود تیواری نے بھی الزام لگایا کہ حکومت آئینی حقوق کو سلب کر رہی ہے اور آئینی اداروں کو کمزور کر رہی ہے۔ انہوں نے کہا کہ اپوزیشن خارجہ پالیسی کا معاملہ بھی اٹھائے گی۔ ہماری خارجہ پالیسی کہاں پہنچ گئی ہے کوئی ہمارے ساتھ کھڑا نہیں ہے۔ کانگریس کے رکن پارلیمنٹ ڈاکٹر سید ناصر حسین کے مطابق، اجلاس میں اس بات پر اتفاق کیا گیا کہ پہلے مرحلے میں منریگا سب سے بڑا اور مرکزی مسئلہ ہوگا۔ پارٹی کا موقف ہے کہ حکومت نے اس اسکیم کو کمزور کیا ہے، جس کا براہِ راست اثر دیہی مزدوروں اور کمزور طبقات پر پڑ رہا ہے۔ اس کے ساتھ ساتھ ایس آئی آر معاملے کو بھی پوری شدت کے ساتھ ایوان میں اٹھانے کا فیصلہ کیا گیا۔میٹنگ میں ماحولیاتی خدشات سے جڑے معاملات پر بھی توجہ دی گئی۔ کانگریس نے طے کیا کہ اراولی پہاڑی سلسلے اور گریٹ نکوبار پروجیکٹ سے متعلق امور کو پارلیمنٹ میں نمایاں طور پر پیش کیا جائے گا۔ پارٹی کے مطابق، ان منصوبوں سے ماحولیات، حیاتیاتی تنوع اور مقامی آبادی کے مفادات کو شدید نقصان پہنچنے کا اندیشہ ہے، جس پر حکومت سے جواب طلب کیا جانا ضروری ہے۔خارجہ پالیسی کے محاذ پر بھی کانگریس نے حکومت کو گھیرنے کی حکمتِ عملی بنائی ہے۔ پارٹی کے مطابق ہندوستان کی خارجہ پالیسی کمزور ہو رہی ہے، امریکہ کی جانب سے ٹیرف اور روس سے تیل خریدنے کے معاملے پر دباؤ ڈالا جا رہا ہے، جو حکومت کی سفارتی ناکامی کو ظاہر کرتا ہے۔ کانگریس نے پارلیمنٹ کے 28 جنوری سے شروع ہونے جا رہے بجٹ اجلاس کے لیے اپنی حکمتِ عملی کو حتمی شکل دینے کے مقصد سے پارلیمانی اسٹریٹجی گروپ کی اہم میٹنگ منعقد کی، جو منگل کو سی پی پی چیئرپرسن سونیا گاندھی کی رہائش گاہ پر ہوئی۔ میٹنگ کی صدارت سونیا گاندھی نے کی، جس میں کانگریس صدر ملکارجن کھڑگے، لوک سبھا میں قائدِ حزبِ اختلاف راہل گاندھی اور پارٹی کے سینئر قائدین شریک ہوئے۔ اجلاس میں بجٹ اجلاس کے پہلے مرحلے کے دوران ایوان میں اٹھائے جانے والے اہم سیاسی، سماجی اور اقتصادی موضوعات پر تفصیلی غور و خوض کیا گیا۔علاوہ ازیں، جموں و کشمیر اور لداخ کے ریاستی درجہ کو بحال کرنے کے مسئلے پر بھی ایوان میں بحث چھیڑنے کا فیصلہ کیا گیا۔ کانگریس کا کہنا ہے کہ ان خطوں کے عوام طویل عرصے سے اپنے جمہوری حقوق اور ریاستی شناخت کی بحالی کا مطالبہ کر رہے ہیں، جسے نظرانداز نہیں کیا جا سکتا۔ اجلاس میں اندور اور بنگلورو میں آلودہ پانی کے باعث ہونے والی اموات کا معاملہ بھی زیرِ بحث آیا اور اسے انسانی جانوں سے جڑا سنگین مسئلہ قرار دیتے ہوئے پارلیمنٹ میں اٹھانے پر اتفاق ہوا۔ہمیں یہ بھی نہیں معلوم کہ کس کا ساتھ دینا ہے، کون ہمارا ساتھ دے گا۔ انہوں نے کہا کہ حکومت کی معاشی پالیسی کے حوالے سے روپیہ کم ترین سطح پر پہنچ گیا ہے۔ انہوں نے مزید کہا کہ امریکہ ٹیرف لگانا اور روسی تیل کی خریداری کے معاملے کو جاری رکھے ہوئے ہے۔ بدترین فضائی آلودگی کو دیکھتے ہوئے جو ہم نے دہلی اور دیگر جگہوں پر دیکھی ہے، ہم اس مسئلے کو بھی اٹھائیں گے… ہم اندور میں آلودہ پانی کی وجہ سے ہونے والی اموات کا مسئلہ بھی اٹھائیں گے۔ کانگریس لیڈر نے کہا کہ منریگا کا مسئلہ اس لیے بھی اہم ہے کہ اس اسکیم سے نہ صرف مہاتما گاندھی کا نام ہٹا دیا گیا ہے بلکہ دیہی علاقوں میں روزگار کو بھی ختم کیا جا رہا ہے۔ انہوں نے یہ بھی کہا کہ جموں و کشمیر کو مکمل ریاست کا درجہ دینے، ووٹ کی چوری، اور بے روزگاری کو بھی اس اجلاس کے دوران اٹھایا جائے گا۔