علی گڑھ،سماج نیوز سروس : علی گڑھ مسلم یونیورسٹی کی نیشنل سروس اسکیم (این ایس ایس) اکائی نے عالمی یومِ خواتین کے موقع پر ایک پروگرام منعقد کیا، جس میں معاشرے میں خواتین کے کردار کو اجاگر کرنے اور صنفی مساوات اور خواتین کو بااختیار بنانے پر زور دیا گیا۔ ڈاکٹر فائزہ عباسی نے مہمانِ خصوصی کی حیثیت سے اپنے خطاب میں خواتین کے درمیان تعلیم، خود اعتمادی اور قیادت کی اہمیت پر زور دیا۔ انہوں نے کہا کہ خواتین نے تعلیم، سائنس، انتظامیہ، کھیل اور سماجی خدمات سمیت مختلف شعبوں میں نمایاں خدمات انجام دی ہیں۔ انہوں نے طلبہ اور رضاکاروں کو ترغیب دی کہ وہ ایسا ماحول قائم کرنے کے لیے کام کریں جہاں خواتین کو مساوی مواقع اور احترام حاصل ہو۔ مہمانِ اعزازی ڈاکٹر امیشا ٹھاکر نے معاشرے میں صنفی حساسیت اور خواتین کے احترام کو فروغ دینے میں تعلیمی اداروں کے کردار کو اجاگر کیا۔ انہوں نے طلبہ کو تلقین کی کہ وہ سماجی سرگرمیوں میں فعال طور پر حصہ لیں اور ایک زیادہ منصفانہ اور جامع معاشرے کی تعمیر میں اپنا کردار ادا کریں۔ پروگرام آفیسرز ڈاکٹر قرۃ العین اور نازیہ نے مہمانوں کا خیر مقدم کیا اور عالمی یومِ خواتین کی اہمیت پر روشنی ڈالتے ہوئے خواتین کے حقوق، وقار اور زندگی کے تمام شعبوں میں مساوی شرکت کے بارے میں بیداری پیدا کرنے کی ضرورت پر زور دیا۔ این ایس ایس پروگرام کوآرڈینیٹر ڈاکٹر محمد محسن خان نے اس اہم دن کو منانے میں طلبہ اور اساتذہ کی کوششوں کو سراہا۔ پروگرام میں این ایس ایس کے رضاکاروں، طلبہ اور اساتذہ کی بڑی تعداد نے شرکت کی۔ مس نازیہ پروین نے اظہارِ تشکر کیا۔ اس موقع پر پروگرام آفیسرز ڈاکٹر ارسلان، ڈاکٹر عبدالجبار، ڈاکٹر نوشاد، ڈاکٹر آفتاب احمد انصاری، محمد عمران خان، شعیب رضا اور نعیم احمد موجود تھے۔
