نارتھ ساؤنڈ (یو این آئی) ایڈم زمپا کے 12 رن پر چار وکٹوں کے قہر کے بعد ڈیوڈ وارنر (20) اور ٹریوس ہیڈ (34) کی طوفانی اننگز کی بدولت آسٹریلیا نے ٹی ٹوئنٹی ورلڈ کپ کے 24ویں میچ میں محض 34 گیندوں میں ہدف حاصل کر تے ہوئے نمیبیا کو نو وکٹوں سے شکست دی۔ اس جیت کے ساتھ ہی آسٹریلیا سپر ایٹ میں داخل ہو گیا ہے۔
آسٹریلیا نے ٹاس جیت کر پہلے گیند بازی کا فیصلہ کیا اور اسے درست ثابت کرتے ہوئے اس کے گیند بازوں نے نمیبیا کی پوری ٹیم کو 17 اوورز میں محض 72 رنز پر آؤٹ کر دیا۔ نمیبیا کی جانب سے کپتان ایرارڈ ایراسمس نے سب سے زیادہ 34 رن بنائے۔ مائیکل وین لنگن 10 رن بنانے کے بعد آؤٹ ہوئے۔ آسٹریلیائی گیند بازوں کے قہر کے سامنے نمیبیا کا کوئی بلے باز ڈبل فیگر تک بھی نہ پہنچ سکا۔ آسٹریلیا کی جانب سے ایڈم زمپا نے چار وکٹ حاصل کئے۔ جوش ہیزل ووڈ اور مارکس اسٹوئنس نے دو دو وکٹ حاصل کئے۔ پیٹ کمنز اور نیتھن ایلس نے ایک ایک بلے باز کو آؤٹ کیا۔
اس 73 رن کے چھوٹے ہدف کے جواب میں آسٹریلیا کی اوپننگ جوڑی ڈیوڈ وارنر اور ٹریوس ہیڈ نے طوفانی انداز میں آغاز کیا۔ اسی دوران دوسرے اوور کی چوتھی گیند پر ڈیوڈ ویزا نے وارنر کو روبن ٹرمپل مین کے ہاتھوں کیچ آؤٹ کرا دیا۔ وارنر نے آٹھ گیندوں میں تین چوکے اور ایک چھکا لگا کر 20 رن بنائے۔ جبکہ ٹریوس ہیڈ نے 17 گیندوں پر 34 رن کی ناٹ آؤٹ اننگز کھیلی جس میں پانچ چوکے اور دو چھکے شامل تھے۔ کپتان مچل مارش نو گیندوں پر 18 رن بنانے کے بعد ناٹ آؤٹ رہے۔ آسٹریلیا نے 5.4 اوورز میں ایک وکٹ پر 74 رنز بنائے اور میچ نو وکٹوں سے جیت لیا۔ اس فتح کے ساتھ آسٹریلیا جنوبی افریقہ کے بعد سپر 8 راؤنڈ میں پہنچنے والی دوسری ٹیم بن گئی۔نمیبیا کی جانب سے واحد وکٹ ڈیوڈ ویزا نے حاصل کیا۔
