سرینگر، قومی تحقیقاتی ایجنسی NIAاورریاستی تحقیقاتی ایجنسیSIAکی ٹیموںنے ملی ٹنسی فنڈنگ کیسوں کے سلسلے میں منگل کی صبح جموں وکشمیرکے 5اضلاع میں 12مشتبہ افراد کے گھروں کی تلاشی کارروائی عمل میں لائی ،جس دوران ایک سوزیٹھ سری نگرمیں ایک مشتبہ شخص کوحراست میں لیاگیاجبکہ ٹیموںنے متعلقہ کیسوں سے جڑے کچھ اہم ثبوت وشواہد بصورت موبائل فون،دیگر الیکٹرانک آلات وکاغذات کے ضبط کئے۔تفصیلات کے مطابق ایک درج ملی ٹنسی فنڈنگ کیس کی تحقیقات وچھان بین کے سلسلے میں قومی تحقیقاتی ایجنسی NIAکی ٹیموں نے منگل کی صبح جموں وکشمیر میں ایک درجن مقامات پر چھاپے ڈالے اوروہاں تلاشی کارروائی عمل میں لائی۔این آئی اے کی ٹیموں نے کشمیر میں سری نگر، اونتی پورہ، پلوامہ، کولگام اور اننت ناگ کے علاوہ جموں اور پونچھ اضلاع میں بھی کم سے کم ایک درجن مقامات پر چھاپے مار کارروائیاں عمل میں لائیں۔اس دوران این آئی اے کی ٹیم نے ایک شخص کو پوچھ گچھ کے لئے حراست میں لیا۔حکام نے بتایا کہ قومی تحقیقاتی ایجنسی (این آئی اے) نے سری نگر کے سوزیٹھ علاقے سے پوچھ گچھ کیلئے ایک شخص کو حراست میں لیا ہے۔حراست میں لیے گئے شخص کی شناخت اسحاق احمد بٹ کے نام سے ہوئی ہے۔گرفتار شخص اسحاق ڈار کے والد محمد رمضان بٹ نے میڈیا کو بتایاکہ منگل کی صبح ساڑھے5بجے سے 6بجے صبح کے درمیان این آئی اے کی ایک ٹیم نے ہمارے گھر میں چھاپہ ڈالا،اور میرے بیٹے اسحاق کو طلب کیا اور اسے اس کے موبائل فون کیساتھ لے گئے۔ محمد رمضان بٹ کے بقول اْن کابیٹاایک مزدور کے طور پر کام کرتا ہے۔انہوں نے مزید کہا کہ میرے بیٹے کاملی ٹنسی یا پتھراو سے کوئی تعلق نہیں ہے۔اہل خانہ نے بتایا کہ اسحاق ناخواندہ ہے اور کھڑکیوں کے شیشے ٹھیک کرنے کا کام کرتا ہے۔اس دوران این آئی اے کی الگ الگ ٹیموں نے اونتی پورہ، پلوامہ، کولگام اور اننت ناگ کے علاوہ جموں اور پونچھ اضلاع میں بھی مشتبہ افراد کے گھروں اور دیگر مقامات کی تلاشی لی۔میڈیا رپورٹس میں بتایاگیاکہ این آئی اے کی ایک ٹیم نے ضلع پونچھ کے کھنیتر گائوںمیں ایک رہائشی مکان پر چھاپہ ڈالا،اوریہاں سے ایک خاتون کو حراست میں لیاگیا۔بتایا جاتاہے کہ قومی تحقیقاتی ایجنسیوںکی ٹیموںنے متعلقہ کیسوں سے جڑے کچھ اہم ثبوت وشواہد بصورت الیکٹرانک آلات وکاغذات کے ضبط کئے۔یہ بھی بتایاجاتاہے کہ یہ چھاپے گزشتہ سال درجکئے گئے ملی ٹنسی فنڈنگ کے ایک مقدمے کے سلسلے میں مارے گئے۔اس دوران ریاستی تحقیقاتی ایجنسیSIAکی ایک ٹیم نے منگل کی صبح جنوبی ضلع پلوامہ کے پانپور قصبہ میں ایک خاتون علیحدگی پسند لیڈر کے گھر پر چھاپہ مارا۔ذرائع نے بتایاکہ جموں کی ریاستی تحقیقاتی ایجنسی کی ایک ٹیم ) نے خاتون علیحدگی پسند لیڈر یاسمین راجہ کے گھر واقع تلہ باغ پانپور میں چھاپہ ڈالا ،اوریہاں تلاشی کارروائی عمل میں لائی۔ پولیس ذرائع نے بتایا کہ پولیس سٹیشن گاندھی نگر جموںمیں گزشتہ سال درج ایک کیس کے سلسلے میں تیسرے ایڈیشنل جج جموں کی عدالت کی ہدایت پر تلاشی لی گئی۔ قابل ذکر بات یہ ہے کہ پولیس نے گزشتہ سال جموں و کشمیر کے ایک سابق وزیر جتیندر سنگھ عرف بابو سنگھ کو جموں خطہ میں مبینہ طور پرحوالہ کی رقم کے معاملے میں گرفتار کیا تھا۔ پولیس ذرائع نے بتایا کہ بابو سنگھ سے متعلق کیس کے حوالے سے یاسمین راجہ کے گھر کی تلاشی لی گئی اور اس سلسلے میں دفعہ 13، 16، 17، 18، 20،21، 38،39 ،40اوریواے پی کے سیکشن120Bاور121کے تحت باقاعدہ ایف آئی آر نمبر73/2022 پولیس ا سٹیشن گاندھی نگر جموں میںدرج کی گئی۔ ان کا کہنا تھا کہ یاسمین راجہ کے2موبائل فون ایس آئی اے جموں نے گواہوں کی موجودگی میں ضبط کئے۔
