دمشق (ہ س )۔اسرائیلی طیاروں نے بدھ اور جمعرات کی درمیانی شب شام پر فضائی حملے کیے جن میں خاص طور پر دمشق کے شمال میں سائنسی تحقیقی مرکز کے اطراف اور حماہ شہر کے علاقوں کو نشانہ بنایا گیا۔ رپورٹ کے مطابق ادھر اسرائیلی فوج نے دمشق میں شامی فوجی اڈوں اور دیگر عسکری بنیادی ڈھانچے کی تنصیبات پر حملوں کی تصدیق کی ہے۔اسرائیلی فوج کے ترجمان افیخائی ادرعی نے ایکس” پلیٹ فارم پر بتایا کہ فوج نے حماہ اور حمص میں فوجی اڈوں پر باقی فوجی صلاحیت کو نشانہ بنایا۔ اسرائیل کو درپیش کسی بھی خطرے کو ختم کرنے کے لیے کام جاری رہے گا۔دوسری جانب شامی وزارت خارجہ نے ملک پر اسرائیلی حملوں کی مذمت کی ہے۔ وزارت نے "ایکس” پلیٹ فارم پر جاری ایک بیان میں اس کارروائی کو بین الاقوامی قوانین کی کھلی خلاف ورزی قرار دیا۔اسی طرح دمشق نے عالمی برادری پر زور دیا کہ وہ اسرائیل پر دباؤ ڈالے تا کہ وہ اپنی "جارحیت” بند کرے اور بین الاقوامی قانون کی پاسداری کرے۔العربیہ نیوز کے ذرائع کے مطابق شام میں حماہ کے فوجی ہوائی اڈے پر 12 حملے کیے گئے۔ ان کے نتیجے میں متعدد افراد زخمی ہوئے۔ اسرائیلی حملوں میں ہوائی اڈے پر موجود جنگی طیاروں کو نشانہ بنایا گیا۔حمص کے دیہی علاقے میںT4 فوجی ہوائی اڈے پر بھی فضائی حملہ کیا گیا۔ درعا کے مغربی دیہی علاقے پر اسرائیلی بم باری کے نتیجے میں 9 افراد جاں بحق ہو گئے۔
