نیویارک، (یواین آئی) نیویارک کے میئر ظہران ممدانی نے امریکی صدر ڈونلڈ ٹرمپ کی انتظامیہ کو شدید تنقید کا نشانہ بناتے ہوئے وینزویلا کے صدر نیکولس مادورو اور ان کی اہلیہ کی امریکی فوج کے ہاتھوں گرفتاری کو بین الاقوامی قوانین کی صریح خلاف ورزی اور جنگی جارحیت قرار دیا ہے۔ ان کے مطابق طاقت کے استعمال کے ذریعے حکومتوں کی تبدیلی نہ صرف غیر اخلاقی ہے بلکہ عالمی امن کے لیے بھی سنگین خطرہ بن سکتی ہے۔ڈیموکریٹک پارٹی کے سوشلسٹ دھڑے سے وابستہ ممدانی نے اس کارروائی کی کھلے لفظوں میں مخالفت کی، جس کے تحت مادورو اور ان کی اہلیہ سیلیا فلورِس کو حراست میں لیا گیا۔ امریکی حکام کے مطابق دونوں کو 2020 سے منشیات سے منسلک دہشت گردی کے الزامات کے تحت مطلوب قرار دیا گیا تھا، تاہم ممدانی کے نزدیک یہ اقدام قانونی کم اور سیاسی زیادہ ہے۔بروکلین میں منعقدہ ایک پریس کانفرنس سے خطاب کرتے ہوئے میئر نے انکشاف کیا کہ انہوں نے اس فوجی کارروائی پر شدید اعتراض ریکارڈ کرانے کے لیے صدر ٹرمپ کو براہِ راست فون کیا۔ ان کا کہنا تھا کہ یہ اختلاف وائٹ ہاؤس کے ساتھ ان کا پہلا براہِ راست تصادم ہے، جو انہوں نے گزشتہ بدھ کو میئر کے عہدے کا حلف اٹھانے کے بعد کیا۔ممدانی نے واضح کیا کہ ان کی مخالفت کی بنیاد طاقت کے ذریعے حکومتوں کی تبدیلی کے خلاف اصولی موقف اور بین الاقوامی قوانین کے احترام پر ہے۔ ان کے مطابق کسی بھی خودمختار ریاست پر یکطرفہ حملہ نہ صرف عالمی قوانین کو پامال کرتا ہے بلکہ اس کے منفی اثرات امریکہ کے اندر بھی محسوس کیے جاتے ہیں، خاص طور پر نیویارک جیسے شہر میں جہاں وینزویلا سے تعلق رکھنے والی ایک بڑی کمیونٹی آباد ہے۔اسی معاملے پر امریکی کانگریس کی رکن الیگزانڈریا اوکاسیو کورٹیز نے بھی فوجی کارروائی کے پسِ پردہ مقاصد پر سوال اٹھائے۔ انہوں نے سوشل میڈیا پلیٹ فارم ایکس پر اپنے بیان میں کہا کہ منشیات کے خلاف کارروائی کا مؤقف محض ایک جواز ہے، جبکہ اصل ہدف وینزویلا کے تیل کے ذخائر اور وہاں کی حکومت کی تبدیلی ہے۔کورٹیز کے مطابق امریکی انتظامیہ اس معاملے کو استعمال کر کے عوام کی توجہ اندرونِ ملک سنگین مسائل، جیسے صحت کی سہولیات کی بڑھتی ہوئی لاگت اور ایپ اسٹین کیس جیسے حساس معاملات سے ہٹانے کی کوشش کر رہی ہے۔
