کولکاتا: کلکتہ ہائی کورٹ نے مغربی بنگال میں رام نومی کے موقع پر ریاست کے مختلف اضلاع میں ہونے والے تشدد کے حوالہ سے این آئی اے سے تحقیقات کرانے کا حکم صادر کیا ہے۔ خیال رہے کہ بنگال میں رام نومی کے موقع پر ہاوڑہ اور دالکولا سمیت متعدد شہروں میں تشدد کی آگ بھڑک گئی تھی۔رام نومی کے موقع پر نکالے جانے والے جلوس کے دوران ہونے والے تشدد میں پتھربازی، آگزنی اور مار پیٹ کے واقعات سامنے آئے تھے۔ اسی اثنا میں پولیس کی گاڑیوں، دکانوں اور عوامی نقل و حمل کی گاڑیوں کو نذر آتش بھی کر دیا گیا تھا۔ مشتعل ہجوم کو منتشر کرنے کے لیے پولیس کو طاقت کا استعمال کرتے ہوئے آنسو گیس کے گولے بھی داغنے پڑے تھے۔مغربی بنگال میں رام نومی کے موقع پر 30 مارچ کو ہاوڑا، شمالی دناج پور، اسلام پور میں جلوس کے دوران جھڑپ ہوئی تھی۔ اس دوران ایک شخص ہلاک ہو گیا تھا۔
بنگال میں ہوئے تشدد پر سیاسی ہنگامہ آرائی بھی ہوئی تھی۔ ٹی ایم سی اور بی جے پی دونوں جماعتوں نے ایک دوسرے پر تشدد کو فروغ دینے کا الزام عائد کیا تھا۔بنگال میں حزب اختلاف کے لیڈر شوبھندو ادھیکاری کی طرف سے دائر کی گئی عرضی پر قائم مقام چیف جسٹس ٹی ایس سیواگنانام کی سربراہی میں ہائی کورٹ کی بنچ نے کیس کو بنگال پولس سے این آئی اے کو منتقل کرنے کا حکم دیا۔ اپنی پی آئی ایل میں ادھیکاری نے کہا ہے کہ رام نومی تشدد میں بم دھماکے بھی ہوئے تھے اور اس کی جانچ این آئی اے سے ہونی چاہیے۔اس عرضی پر عدالت نے بنگال پولیس کو ہدایت دی ہے کہ وہ دو ہفتوں کے اندر اس کیس سے متعلق تمام ریکارڈ اور سی سی ٹی وی فوٹیج مرکزی حکومت کے حوالے کرے۔ ساتھ ہی مرکز سے کہا گیا ہے کہ وہ یہ دستاویزات این آئی اے کو بھیجے۔
