سید پرویز قیصر
ناٹنگھم میں ویسٹ انڈیز کے خلاف جاری دوسرے ٹسٹ کے پہلے دن انگلینڈ نے ٹاس ہارنے کے بعد پہلے بلے بازی کرتے ہوئے88.3 اوور میں416 رن بنائے۔ انگلینڈ کی ٹیم کے تیز پچاس رن اور بین ڈوکیٹ کی جارحانہ بلے بازی کی وجہ سے ایسا ممکن ہوسکا۔ انگلینڈ نے پانے پچاس رن4.2 اوور میں مکمل کئے جو ٹسٹ کرکٹ میں کسی ٹیم کے سب سے تیز پچاس رن ہیں۔ اس سے پہلے ٹسٹ کرکٹ میں سب سے تیز پچاس رن بنانے کا ریکارڈ انگلینڈ ہی کے پاس تھا جس نے جنوبی افریقہ کے خلاف اوول میں1994میں ہوئے ٹسٹ میچ میں 4.3 اوور میں ایسا کیا تھا۔ ویسٹ انڈیز کے خلاف سب سے تیز پچاس رن بنانے کا ریکارڈ ہندوستان کے پاس ہے جس نے پورٹ آف اسپین میں2023 میں ہوئے ٹسٹ میچ میں5.3 اوور میں اپنے پچاس رن مکمل کئے تھے۔
بین ڈوکیٹ نے 32 بالوں پر گیارہ چوکوں کی مدد سے اپنی نصف سنچری مکمل کرنے میں کامیاب ہوئے۔ انہوں نے ٹسٹ کے پہلے گھنٹہ میں ہی اپنی نصف سنچری مکمل کرلی تھی اورجب پانی کا وقفہ ہوا تو وہ43 بالوں پر بارہ چوکوں کی مدد سے 60 رن بناکر کھیل رہے تھے۔ بائیں ہاتھ کے اس بلے باز نے59 بالوں پر چودہ چوکوں کی مدد سے71 رن بنائے تھے اور شمار جوزف کا شکار بنے تھے۔انہیں جیسن ہولڈر نے کیچ کیا تھا۔
انگلینڈ میں ٹسٹ کے پہلے دن کئی مرتبہ چار سو سے زیادہ رن بن چکے ہیں ۔ ٹسٹ کرکٹ میں ایک دن میں سب سے زیادہ رنوں کا ریکارٖڈ انگلینڈ میں ہی بنا ہے۔ مانچسٹر میں ہندوستان اور انگلینڈ کے مابین جولائی 1936 میں ہوئے ٹسٹ میچ کے دوسرے دن چھ وکٹوں کے نقصان پر588رن بنے تھے۔ اس ٹسٹ میں پہلے دن ہندوستان کو68.1 اوور میں ہندوستان کو 203 رن پر آوٹ کرنے کے بعد انگلینڈ نے دو وکٹ پر 173 رن بنائے تھے۔اس طرح میچ کے پہلے دن بارہ وکٹوں کے نقصان پر376 رن بنے تھے۔ایک دن کے آرام کے بعد جب ٹسٹ شروع ہوا تو انگلینڈ نے اپنی اننگ142 اوور میں آٹھ وکٹ پر 571رن بناکر ڈکلیر کی تھی یعنی اس دن اس نے چھ وکٹ پر398 رن بنائے تھے۔ ہندوستان نے باقی بچے ہوئے دن میں کسی نوصان کے بغیر190 رن بنائے تھے۔ اس طرح ٹسٹ کے دوسرے دن چھ وکٹوں کے نقصان پر588 رن بنے تھے۔ تین روزہ یہ ٹسٹ بغیر کسی فیصلہ کے ختم ہوا تھا۔
ٹسٹ کے پہلے دن ایک ٹیم کے ذریعے سب سے زیادہ رن بنانے کا ریکارڈ انگلینڈ کے ہی پاس ہے جس نے پاکستان کے خلاف روالپنڈی میں دسمبر2022 میں ہوئے ٹسٹ میں چار وکٹ پر 506 رن بنائے تھے۔ اس نے اپنی پہلی اننگ میں101 اوور میں657 رن بنائے تھے جس میں ہیری بروک (153)، زک کراولی (122)، اولی پوپ (108) اور بین ڈوکیٹ (107)کے سنچریوں کی بدولت یہ اسکور ممکن ہوسکا تھا۔انگلینڈ نے اس ٹسٹ میں74 رن سے جیت اپنے نام کی تھی۔
انگلینڈ میںٹسٹ کے پہلے دن سب سے زیادہ رن بنانے والی ٹیم ویسٹ انڈیز ہے جس نے انگلینڈ کے خلاف لیڈز میں1976 میں ہوئے ٹسٹ میچ میں نو وکٹ پر 437 رن بنائے تھے۔ اس ٹسٹ میں ویسٹ انڈیز نے 55 رن سے جیت اپنے نام کی تھی۔
