احمد آباد،(یو این آئی)ہندوستان کی مایہ ناز پیرا ٹیبل ٹینس کھلاڑی اور ملک کی نمبر ون رینکڈ پلیئر نورجہاں نور علی نے ایشیائی پیرا گیمز 2026 میں اپنی جگہ پکی کرنے کے لیے ایک بڑے بین الاقوامی مہم کا آغاز کر دیا ہے۔ یہ مہم یورپ اور ایشیا کے چار اہم ٹورنامنٹس پر مشتمل ہے، جو اکتوبر میں جاپان (ناگویا) میں ہونے والے گیمز کے لیے کوالیفکیشن کا راستہ ہموار کرے گی۔ آئی ٹی ٹی ایف کی عالمی پیرا رینکنگ میں کلاس 7 کے زمرے میں 27 ویں نمبر پر موجود نورجہاں کا ہدف ایشیا کی ٹاپ 6 کھلاڑیوں میں شامل ہونا ہے۔ اس وقت وہ ایشیا میں 8 ویں نمبر پر ہیں اور کوالیفائی کرنے کے لیے انہیں اپنی رینکنگ میں بہتری لانی ہے۔محض پانچ سال کی عمر میں پولیو کا شکار ہونے والی نورجہاں نے ہمت نہیں ہاری۔ انہوں نے 2022 میں دوبارہ پیشہ ورانہ ٹیبل ٹینس کا آغاز کیا اور دیکھتے ہی دیکھتے قومی سطح پر اپنی دھاک بٹھا دی۔ انہوں نے الٹیمیٹ ٹیبل ٹینس (یو اٹی ٹی) نیشنل چیمپئن شپ میں گولڈ میڈل جیتا اور حال ہی میں اندور میں منعقدہ سینئر نیشنل چیمپئن شپ 2025-26 میں اپنے اعزاز کا دفاع کر کے بھارت کی نمبر ون کھلاڑی بن گئیں۔احمد آباد سے تعلق رکھنے والی نورجہاں ‘اڈانی ایئرپورٹ ہولڈنگز میں جونیئر آفیسر کے طور پر کام کرتی ہیں۔ کمپنی اور اڈانی اسپورٹس لائن نے ان کی غیر معمولی صلاحیتوں کو دیکھتے ہوئے انہیں ٹریننگ اور غیر ملکی دوروں کے لیے کام کے اوقات میں نرمی اور مالی تعاون فراہم کیا ہے۔پرنب اڈانی (ڈائریکٹر، اڈانی انٹرپرائزز) نے ان کے عزم کو سراہتے ہوئے کہا”نورجہاں کا سفر ان کی ہمت اور ڈسپلن کی جیتی جاگتی مثال ہے۔ ہمیں فخر ہے کہ ہم اس اہم موڑ پر ان کے ساتھ ہیں اور ہمیں یقین ہے کہ وہ ملک کا نام روشن کریں گی۔”نورجہاں خود بھی اس مرحلے کو اپنے کیریئر کا سب سے اہم موڑ قرار دے رہی ہیں اور ان کی تمام تر توجہ اب ایشیا کی ٹاپ 6 کھلاڑیوں میں جگہ بنانے پر مرکوز ہے۔دورہِ یورپ و ایشیا کا شیڈول پوڈگوریکا (مونٹی نیگرو): 29 اپریل تا 2 مئی (کامیابی سے مکمل)۔لاسکوس (سلووینیا): 5 سے 9 مئی تک جاری ورلڈ پیرا چیلنجر۔لاسکوس (ایلیٹ کیمپ): 11 سے 15 مئی تک۔تائی پے سٹی (تائیوان): 17 سے 21 مئی تک منعقد ہونے والا فائنل مرحلہ۔
