بہارشریف (ایم ایم عالم) منگل کے روز ضلع ہیڈکوارٹر بہارشریف کے صدر ہسپتال کیمپس میں واقع اے این ایم اسکول میں نرسوں کے عالمی دن کے موقع پر ایک خصوصی پروگرام کا انعقاد کیا گیا۔ پروگرام کا آغاز شمع روشن سے ہوا۔ماڈل ہسپتال کے ڈپٹی سپرنٹنڈنٹ ڈاکٹر راجیو رنجن، سابق ڈپٹی سپرنٹنڈنٹ سوجیت کمار اکیلا،ڈاکٹر روہت امر اور اے این ایم اسکول کی پرنسپل الکا رانی نے مشترکہ طور پر شمع روشن کر پروگرام کا افتتاح کیا۔اس موقع پر جدید نرسنگ کی بانی سمجھی جانے والی فلورنس نائٹنگیل کو پھولوں کی چادر چڑھا کر خراز عقیدت پیش کی گئی۔پروگرام میں موجود طلباء اور ہیلتھ ورکرز نے ان کی خدمات کو یاد کیا اور نرسنگ کی اہمیت کو اجاگر کیا۔ڈپٹی سپرنٹنڈنٹ ڈاکٹر راجیو رنجن نے کہا کہ نرسوں کا عالمی دن ہر سال 12 مئی کو فلورنس نائٹنگیل کی یوم پیدائش کی یاد میں منایا جاتا ہے۔انہوں نے کہا کہ مریضوں کی خدمت اور صحت کے نظام کو مضبوط بنانے میں نرسوں کا کردار بہت اہم ہے۔اس دوران اے این ایم اسکول کی پرنسپل الکا رانی نے کہا کہ اس دن نرسنگ کی جدید تربیت کی بنیاد رکھی گئی۔اس سال کے موضوع پر تفصیلی گفتگو کرتے ہوئے”نرس جتنی زیادہ بااختیار ہوں گی،ملک اتنا ہی مضبوط ہوگا”انہوں نے کہا کہ تربیت یافتہ اور بااختیار نرسیں صحت کی خدمات کو بہتر بنانے میں اہم کردار ادا کرتی ہیں۔پروگرام کے دوران نرسنگ کے شعبے سے متعلق ذمہ داریوں،خدمت کے جذبے اور لگن پر بھی خیالات کا اظہار کیا گیا۔اس موقع پر اے این ایم اسکول کے سینکڑوں سے زائد طلباء موجود تھی۔
