مکہ مکرمہ(ہ س)۔جمعیہ ’ہدیۃ الحاج والمعتمر‘ نے حج 1446ھ کے موسم میں حجاجِ کرام کی خدمت کے لیے ایک کروڑ تحائف اور سہولیات فراہم کرنے کا اعلان کیا ہے۔ یہ اقدامات ذی القعدہ کے آغاز سے لے کر زمینی، فضائی اور سمندری راستوں سے وطن واپس جانے والے حجاج کے وداع تک جاری رہیں گے۔جمعیہ کے چیف ایگزیکٹو انجینئر ترکی الحتیرشی نے بتایا کہ یہ خدمات قومی مرکز برائے غیر منافع بخش شعبے اور وزارتِ حج و عمرہ کی نگرانی میں فراہم کی جا رہی ہیں۔ انہوں نے واضح کیا کہ جمعیہ نے حج و عمرہ کے نظام سے وابستہ مختلف اداروں کے ساتھ مضبوط شراکت داری قائم کی ہے تاکہ ضیوف الرحمن کو اعلیٰ معیار کی سہولیات دی جا سکیں۔ان سہولیات میں 85 لاکھ ٹھنڈے پانی اور جوسز کی بوتلیں، تقریباً 10 لاکھ کھانے کے پیک، سعودی قہوہ، استقبالی ضیافت اور ذاتی نگہداشت کے تحائف شامل ہیں، جو کہ مقدس مقامات، استقبالی مراکز، سرحدی راستوں اور دیگر اہم مقامات پر تقسیم کیے جا رہے ہیں۔انجینئر الحتیرشی نے معاشرے کے تمام افراد سے اپیل کی ہے کہ وہ اس کارِ خیر میں حصہ لیں اور حجاج کی خدمت کے لیے جمعیت کے پروگراموں کی مالی و عملی مدد کریں۔ یہ مدد مکہ مکرمہ اور مدینہ منورہ کے قریب واقع دفاتر یا آن لائن اسٹور کے ذریعے بھی دی جا سکتی ہے۔
