دیوبند،سماج نیوز سروس : عازمین حج 2026کی ٹیکہ کاری کے لئے مسلم فنڈ ٹرسٹ دیوبند کے تعاون سے شیخ الہند ھال عیدگاہ روڑ پر ایک روزہ ویکسینیشن کیمپ لگایا گیا ۔اس کیمپ میں سہارنپور سی ایم او آفس سے آنے والے میڈیکل ٹیم نے صبح 10؍ بجے سے شام 4؍ بجے تک دیوبند اور اس کے قرب وجوار کے 80عازمین کو اڈ ری میننگو اور ویکسین فلو کے ویکسین لگائے اور پولیو ڈراپ پلائی ۔تفصیل کے مطابق سہارنپور ضلع اسپتال سے ڈاکٹر آشیس پونیا اورڈاٹا منیجر مہتاب عالم کی قیادت میں محمد عالم فارماسسٹ ،ایل ٹی اسرار احمد ،ایل ایچ وی پونم تیاگی ،اے وی ایم پنکی ،اے وی ایچ فرح ،امت اور ستار نے شیخ الہند ہال پہنچ کر کیمپ میں آنے والے عازمین کی ٹیکہ کاری کی ،ڈاکٹر آشیش پونیا اورڈاٹا منیجر مہتاب عالم نے بتایا کہ عازمین حج ٹیکہ کاری پروگرام کے تحت 46مرد عازمین اور 34خواتین کو دوران سفر بیماریوں سے محفوظ رکھنے کے لئے ویکسین دی گئی اور پولیو ڈراپ پلائی گئی ۔انہوں نے بتایا کہ 16؍فروری بروز پیر مدرسہ خلیلیہ نہرو مارکیٹ سہارنپور اور 17؍فروری بروز منگل مدرسہ احیاء العلوم دینی والا انبالہ روڑ سہارنپور میں عازمین کی ٹیکہ کاری کی جائے گی ۔جوعازمین دیوبند ٹیکہ کیمپ میں ویکسین نہیں لگواسکے وہ اپنی میڈیکل رپورٹ ساتھ لے جاکر مدرسہ خلیلیہ یا مدرسہ احیاء العلوم انبالہ روڑ سہارنپور پہنچ کر ویکسین لگوالیں ،ڈاکٹرآشیش نے بتایا کہ ویکسین سرٹیفکیٹ کے بغیر سفر حج ممکن نہیں ہے ہر عازم کے پاس ویکسینیشن سرٹیفکیٹ ہونا ضروری ہے ۔مسلم فنڈ ٹرسٹ دیوبند کے منیجر سہیل صدیقی نے بتایا کہ مسلم فنڈ کی جانب سے عازمین کے حج فارم بھروانے اور ٹیکہ کاری کیمپ لگانے کی خدمات گزشتہ 30؍سالوں انجام دی جارہی ہے ۔انہوں نے کہا کہ حج فلائٹ کا شیڈول آنے کے بعد عازمین کی حج ٹریننگ کے لئے تین روزہ عملی ٹریننگ کیمپ منعقد کیا جائے گا ۔کیمپ کنوینر مولانا دلشاد قاسمی اور فہیم صدیقی نے بتایا کہ ٹیکہ کاری کیمپ میں آنے والے عازمین کو نہایت پر سکون انداز میں ویکسین لگائی گئیں ۔
