،پریس ریلیز،ہماراسماج:جمعیۃ علماء ضلع واشم کے زیرِ اہتمام ریسوڑمیں یک روزہ تربیتی ورکشاپ و جلسہ اصلاح معاشرہ زیر صدارت فخرمہاراشٹر مولانا حافظ محمد ندیم صدیقی صدر جمعیۃ علماء مہاراشٹر منعقد ہوا، جس میں علاقہ بھر سے اراکینِ جمعیۃ و عوام الناس نے شرکت کی۔اجلاس تین حصوں میں منقسم رہا۔ پروگرام کا آغاز بدست صوبائی صدر مولانا حافظ محمد ندیم صدیقی کےپرچم کشائی سے ہوا، جس کے بعد تربیتی ورکشاپ مسجد ابو ہریرہ ؓ، احباب نگر، ریسوڑمیں منعقد ہوا۔ تربیتی ورکشاپ کے بعد خواتین میں علماء کرام کا خصوصی بیان ہوا، جس میں خواتین کو تلقین کی گئی کہ موجودہ پرفتن دور میں بھی دینی معاشرہ کو اپنائے ۔بعد نماز مغرب فاطمہ مسجد، ملت نگر، ریسوڑمیں جلسہ اصلاح معاشرہ و سیرۃ النبی کا انعقاد ہوا۔ اجلاس سے خطاب کرتے ہوئے صدر جلسہ مولانا ندیم صدیقی نےاس بات پر زور دیا کہ جمعیۃ کا کام محض ایک تنظیمی سرگرمی نہیں بلکہ ایک خالص اجتماعی اور دینی مشن” ہے جس کی بنیاد اخلاص پر ہے۔ انہوں نے اراکین کو متنبہ کیا کہ وہ اپنے فرائض میں سستی نہ برتیں اور اس تحریک کے روحانی و تربیتی مقصد” کو سمجھیں تاکہ کوئی بھی شخص جمعیۃ کے کام کو پرایا نہ سمجھے بلکہ اسے اپنی ذاتی ذمہ داری قرار دے۔ انہوں نے اراکین کو سیرتِ طیبہ کی روشنی میں ایک بہترین عملی نمونہ بننے کی تلقین کی، جس میں لوگوں کو آپس میں جوڑنا، ان کے بوجھ بانٹنا، مہمان نوازی کرنا اور آفات کے وقت انسانیت کی خدمت کرنا شامل ہے۔اجلاس میں موجود مقرر خصوصی و مبلغ دارالعلوم دیوبند مولانا عرفان قاسمی نےکہاکہ ہم سیرت کے جلسے تو کرتے ہیں، لیکن ہماری زندگیوں میں سیرت کا عکس نظر نہیں آتا،اللہ کے رسول ﷺ کی بعثت کا مقصد اخلاق کی تکمیل تھا۔ اگر ہمارا اخلاق، ہمارا لین دین اور ہمارا پڑوسیوں کے ساتھ سلوک اچھا نہیں ہے، تو ہم نے سیرت کے پیغام کو صحیح معنوں میں نہیں سمجھا۔مفتی محمد روشن شاہ قاسمی صدر دینی تعلیمی بورڈ جمعیۃ علماء مہاراشٹر نے اپنے خطاب میں کہاکہ شریعت نے جس کو جس درجہ میں رکھا ہےاس کو اسی درجہ میں رکھا جائے مثلاًقرآن میں تعلیم کا پہلے ذکر ہے لہذا پہلی کوشش علم دین کا حصول ہونا چایئے۔ مولانا ابراہیم قاسمی جنرل سکریٹری جمعیۃ علماء مہاراشٹرنے کہاکہ اراکین جمعیۃ کو صفات نبی سے متصف ہونا چاہئے، مفتی عبدالرحمن اشرفی جنرل سیکریٹری جمعیۃ علماء مراٹھواڑہ نےکہاکہ شادی بیاہ اور دیگر تقریبات میں فضول خرچی اور غیر اسلامی رسومات سے بچنا ایمان کا تقاضا ہے،مزید براں جمعیۃ علماء کے علاقائی ذمہ داران بالخصوص مولانا آصف مظاہری صدر جمعیۃ علماء ضلع واشم، مولانا طلحہ ضلع نائب صدر،مفتی محمد الیاس ضلع جنرل سکریٹری،مفتی شیخ یونس صدر جمعیۃ علماء تحصیل ریسوڑ،سید مدثرالدین تحصیل جنرل سکریٹری، جناب عبدالواحد خان شہر صدر، جناب کلیم شہر جنرل سکریٹری اور دیگر علماء کرام نے بھی اجلاس عام کو خطاب کیااور از ابتدا تا آخر شریک رہے۔ آخر میں صدر اجلاس مولانا ندیم صدیقی صاحب کی دعاء پر اجلاس کا اختتام ہوا۔ اس اجلاس کو کامیاب بنانے میں جمعیۃ علماء واشم اور جمعیۃ علماء تحصیل و شہر ریسوڑکے ذمہ داران اور کارکنان بالخصوص نوجوان طبقہ نےبے انتہا محنت کی اور اپنا قیمتی وقت دیا اللہ ان کو بہترین بدلہ عطافرمائیں۔
