پٹنہ، : جنتا دل یونائیٹڈ (جے ڈی یو) کے قومی صدر راجیو رنجن سنگھ عرف للن سنگھ نے اپوزیشن اتحاد کو وقت کی ضرورت قرار دیا اور اس سمت میں کانگریس سے مناسب اقدامات کی توقع کی۔ مسٹر سنگھ نے جمعرات کو کانگریس کے قومی صدر ملکارجن کھرگے کو خط لکھ کر 30 جنوری کو سری نگر میں منعقد ہونے والی بھارت جوڑو یاترا کی اختتامی تقریب میں مدعو کرنے کیلئے ان کا شکریہ ادا کیا اور اس میں شرکت سے معذرت کا اظہار کیا۔ اپنی اس عدم شرکت پر افسوس کا اظہار کرتے ہوئے انہوں نے کہا کہ وہ اس تاریخی تقریب میں شرکت کرنا چاہتے تھے لیکن ان کی پارٹی کی انتخابی مہم اسی دن ناگالینڈ کے ووکھا سے شروع ہونی ہے اور ان کی موجودگی ضروری ہے ۔ جے ڈی یو کے قومی صدر نے مسٹر کھرگے سے کہا کہ ان کے خط میں لکھی گئی باتوں اوجو جذبات شیئر کئے گئے ہیں اس کو غور سے پڑھا ہے ۔ اس میں کوئی شک نہیں کہ ملک میں جمہوری اقدار زوال پذیر ہیں اور آئینی ادارے جو ‘آمرانہ ایگزیکٹو پاور’ پر چیک اینڈ بیلنس کو یقینی بناتے ہیں منظم طریقے سے تباہ ہو رہے ہیں۔ ملک جس رفتار سے انتخابی جمہوریت سے انتخابی آمریت میں بدل رہا ہے وہ خوفناک ہے ۔ مسٹر سنگھ نے کہا کہ انہیں یقین ہے کہ بھارت جوڑو یاترا نے عوام سے براہ راست رابطے کی وجہ سے لوگوں کے مزاج، تشویش اور پریشانی کو جاننے ، تجربہ کرنے اور سمجھنے کا موقع فراہم کیا ہے ، جس سے یقینی طور پر 2024 کے لوک سبھا انتخابات میں مشترکہ حکمت عملی بنانے میں مدد ملے گی ۔ انہوں نے کہا کہ ان کی پارٹی (جے ڈی یو) خلوص دل سے محسوس کرتی ہے کہ ملک میں اپوزیشن اتحاد وقت کی ضرورت ہے اور امید کرتی ہے کہ انڈین نیشنل کانگریس اس سمت میں مناسب قدم اٹھائے گی۔ انہوں نے جے ڈی یو کے صدر کے طور پر اپنی پارٹی ، پارٹی کے سپریم لیڈر وزیراعلیٰ نتیش کمار اور پارٹی کے کروڑوں ارکان کی جانب سے کانگریس کو اس تقریب کیلئے نیک خواہشات کا اظہار کیا اور اس کی کامیابی کی خواہش کی۔
