سہرسہ(سالک کوثر امام)بہار حکومت کی جانب سے عوامی مسائل کے بروقت حل اور سرکاری اسکیموں کا فائدہ عوام تک پہنچانے کے مقصد سے ضلع سہرسہ کے مختلف بلاکس میں مجموعی طور پر پندرہ مقامات پر “سہیوگ کیمپ” کا انعقاد کیا گیا۔ ان کیمپوں کی قیادت ضلع مجسٹریٹ، ڈپٹی ڈیولپمنٹ کمشنر، نگر آیوکت، ایڈیشنل کلکٹر اور دیگر سینئر افسران نے کی۔اسی سلسلے میں کہرا بلاک کے بیلہا پٹی پنچایت میں منعقدہ سہیوگ کیمپ کا افتتاح ریاستی وزیر تعلیم و ضلع کے انچارج وزیر متھیلیش تیواری، ضلع مجسٹریٹ دیپیش کمار اور پولیس سپرنٹنڈنٹ ہمانشو نے مشترکہ طور پر چراغ روشن کرکے کیا۔ اس موقع پر بڑی تعداد میں مقامی دیہی عوام، عوامی نمائندے، خواتین گروپوں کی اراکین اور مختلف محکموں کے افسران موجود تھے۔اپنے خطاب میں انچارج وزیر متھیلیش تیواری نے کہا کہ سہیوگ کیمپ کا بنیادی مقصد عوامی شکایات اور سرکاری اسکیموں سے متعلق مسائل کا مقررہ مدت میں حل کرنا ہے۔ انہوں نے کہا کہ ریاستی حکومت شفاف اور آسان طریقے سے فلاحی اسکیموں کو عوام تک پہنچانے کے لیے پابند عہد ہے، اسی مقصد کے تحت پنچایت سطح پر یہ کیمپ منعقد کیے جا رہے ہیں تاکہ عوام کو ان کے گاؤں میں ہی سرکاری سہولیات فراہم کی جا سکیں۔ضلع مجسٹریٹ دیپیش کمار نے بتایا کہ ضلع انتظامیہ کی مسلسل کوششوں کے نتیجے میں موصول ہونے والی تقریباً 85 فیصد درخواستوں کا نمٹارا مقررہ وقت سے پہلے ہی کر لیا گیا ہے، جبکہ باقی درخواستوں پر بھی کارروائی تیزی سے جاری ہے اور انہیں آئندہ 30 دنوں کے اندر حل کر لیا جائے گا۔اس موقع پر انچارج وزیر، ضلع مجسٹریٹ اور پولیس سپرنٹنڈنٹ نے 57 مستحقین اور درخواست گزاروں، جن میں رام چندر یادو، ساجن رام، سرسوتی کماری، آدرش کمار، ستیہ نارائن بھگت، راجیشور یادو اور آنچل کماری شامل ہیں، کو مختلف سرکاری اسکیموں اور درخواستوں کے منظوری سرٹیفکیٹ تقسیم کیے۔کیمپ کے دوران مختلف سرکاری محکموں کی جانب سے اسٹال لگائے گئے جہاں عوام کو حکومت کی فلاحی اسکیموں کے بارے میں معلومات فراہم کی گئیں۔ کئی درخواستوں کا موقع پر ہی نمٹارا بھی کیا گیا، جس پر عوام نے خوشی کا اظہار کیا۔سماجی تحفظ محکمہ کی جانب سے پنشن اسکیموں، محکمہ صحت کی جانب سے آیوشمان بھارت یوجنا، ٹیکہ کاری، ماں اور بچے کی صحت سے متعلق خدمات کی معلومات دی گئیں، جبکہ محکمہ حیوانات نے مویشی پروری، جانوروں کی ویکسینیشن اور مویشی پالکوں کے لیے جاری اسکیموں سے عوام کو واقف کرایا۔دیہی عوام نے پنچایت سطح پر اس طرح کے کیمپوں کے انعقاد کو ایک بہترین اقدام قرار دیتے ہوئے کہا کہ اب انہیں سرکاری دفاتر کے چکر نہیں لگانے پڑ رہے ہیں اور گاؤں میں ہی مسائل کا حل اور اسکیموں کی معلومات مل رہی ہیں، جس سے وقت اور پیسے دونوں کی بچت ہو رہی ہے۔
