دیوبند، ہندوستان میں کسانو ں کو نظر انداز کرنے کی پالیسی کو کسی قیمت برداشت نہیں کیا جائے گا۔ حکومت کو یہ انتباہ بھارتیہ کسان یونین وپچھم پردیش مکتی مورچہ کے قومی صدر بھگت سنگھ ورما نے کلکٹریٹ پارک میں کسانوں کی ایک میٹنگ سے خطاب کرتے ہوئے دیا۔ بھگت سنگھ ورما نے کہا کہ مرکزی اور صوبائی حکومتوں کا یہ دعویٰ تھا کہ 2022میں کسانوں کی آمدنی دوگنی ہوجائے گی ، لیکن کسانوں کے ساتھ اس کے برعکس ہوا کیوں کہ کسانوں کی آمدنی آدھی سے بھی کم ہوگئی جس کے نتیجہ میں کسان قرض دار ہوگئے۔ انہوں نے کہا کہ جب تک کسانوں کی قوت خرید میں اضافہ نہیں ہوگا تب تک یہ ملک اقتصادی طور پر مضبوط نہیں ہوگا۔ اس کے لئے دہلی میں بیٹھے لیڈران کو اقدامات کرنے ہوںگے تاکہ کسانوں کے لئے ترقی کی راہیں ہموار ہوں۔ بھگت سنگھ ورما نے کہا کہ کسانوں کی محنت اور بہترین فصلوں کی پیدائش کے سبب ہی آج حکومت اس ملک کے 80کروڑ لوگوں کو مفت اناج دینے کے قابل ہوئی ہے لیکن حکومت کسانوں کو ان کی فصلوں کی منافع بخش قیمتیں دینا تو دور کی بات ہے فصل پر آنے والی لاگت بھی نہیں دے رہی ہے۔ بھگت سنگھ ورما نے وزیر اعظم نریندر مودی کو ایک تحریر بھیج کر مطالبہ کیا ہے کہ کسانوں کے تمام قرضے معاف کئے جائیں ، ان کو فصلوں کی منافع بخش قیمتیں دلائی جائیں اور منریگا اسکیم کو کھیتی سے منسلک کیا جائے نیز راشٹریہ کسان انکم کمیشن کی تشکیل کرکے ضعیف العمر کسانوں کو 5ہزار روپے ماہانہ پینشن دی جائے اور سب کے لئے تعلیم اور علاج مفت کئے جانے کا اعلان کیا جائے۔ انہوں نے کہا کہ 26اضلاع کو ملاکر علیحدہ صوبہ پچھم پردیش کی تشکیل کی جائے ۔ انہوں نے کہا کہ علیحدہ صوبہ کی تشکیل کے لئے عوام اور کسان کو بین الاقوامی طرز کی تعلیمی اور میڈیکل سہولیات میسر ہونے لگیں گی، اس کے علاوہ غریبوں کے مسائل از خود حل ہوجائیں گے۔ تنظیم کے قومی ترجمان ڈاکٹر اشوک ملک نے کہا کہ اس وقت حکومت کی بے اعتنائی کے ساتھ ساتھ کسانوں کو قدرتی آفات کا بھی سامنا کرنا پڑرہا ہے، اس لئے بے موسم بارش کی وجہ سے برباد ہونے والی فصلوں کا حکومت کسانوں کو معاوضہ دے۔ ڈاکٹر اشوک ملک نے کہا کہ حکومت کی کسان مخالف پالیسیوں کے لئے لوگوں کو خاص طور پر کسانوں کو بیدار کرنے کا کام کیا جارہا ہے۔ تنظیم کے شہر صدر ظہیر ترکی نے کہا کہ کسانوں، مزدوروں اور چھوٹے تاجروں نیز غریبوں کے مفادات کے تحفظ کے لئے کسان یونین نبرد آزما رہے گی، ان کے علاوہ تنظیم کے قومی جنرل سکریٹری روندر چودھری گوجر، صوبائی نائب صدر پنڈت نیرج کپل ، صوبائی سکریٹری عاصم ملک، کمشنری سطح کے نائب صدر سردار گروندر سنگھ بنٹی، صوبائی سکریٹری رشی پال پردھان گوجر، ضلع سکریٹری محبوب حسن، غیور عالم، شہر نائب صدر کلیم الرحمن ، جوگیندر اور نیرج سینی نے بھی اپنے خیالات کا اظہار کیا۔
