ڈربن،( یو این آئی)ہندستانی ویمن کرکٹ ٹیم کی کپتان ہرمن پریت کور نے ٹی ٹوئنٹی فارمیٹ میں ٹیم کی حالیہ ناقص کارکردگی پر تشویش کا اظہار کرتے ہوئے کہا ہے کہ مشکل وقت میں ٹیم کو متحد رہنے اور مثبت سوچ کے ساتھ آگے بڑھنے کی ضرورت ہے۔اتوار کے روز ڈربن میں کھیلے گئے دوسرے ٹی ٹوئنٹی میچ میں جنوبی افریقہ نے ہندوستان کو 8 وکٹوں سے شکست دی۔ اس جیت کے ساتھ ہی میزبان ‘پروٹیاز ٹیم کو پانچ میچوں کی سیریز میں 0-2 کی برتری حاصل ہو گئی ہے۔ یہ اس سال ٹی ٹوئنٹی فارمیٹ میں ہندوستان کی مسلسل تیسری شکست ہے۔جارح مزاج اوپنر شیفالی ورما نے 57 رنز کی برق رفتار اننگز کھیل کر ٹیم کو اچھا آغاز فراہم کیا، لیکن مڈل آرڈر کی ناکامی کے باعث پوری ٹیم 147 رنز پر ڈھیر ہو گئی۔ آخری 10 اوورز میں ہندوستانی بلے باز رنز بنانے میں جدوجہد کرتے نظر آئے۔ 148 رنز کا ہدف میزبان ٹیم نے انتہائی آسانی سے حاصل کر لیا۔ کپتان لورا ولوارٹ (54) اور سنی لوس (57) کے درمیان 106 رنز کی افتتاحی شراکت نے ہندوستان کی جیت کی تمام امیدیں ختم کر دیں۔میچ کے بعد گفتگو کرتے ہوئے ہرمن پریت کور نے کہایہ ایک مشکل وقت ہے اور بطور ٹیم ہمیں ایک دوسرے کا ساتھ دینے کی ضرورت ہے۔ بیٹنگ میں ہم توقعات پر پورا نہیں اتر سکے، خاص طور پر اننگز کے آخری حصے میں۔ جب شاٹس نہ لگ رہے ہوں تو ‘اسٹرائیک روٹیٹ کرنا اہم ہوتا ہے، جس پر ہمیں کام کرنا ہوگا۔ اس کے علاوہ با لنگ اور پاور پلے میں بھی چیزیں ہمارے حق میں نہیں جا رہی ہیں۔اوپنر شیفالی ورما نے اپنی کپتان کی باتوں کی تائید کرتے ہوئے کہا کہ ٹیم اپنی غلطیوں سے سبق سیکھے گی۔ انہوں نے کہا، ہمارے پاس دو دن کا وقفہ ہے، ہم دوبارہ متحد ہوں گے اور سخت محنت کے ذریعے اگلے میچوں اور ورلڈ کپ کے لیے بھرپور تیاری کے ساتھ واپس آئیں گے۔ ہندوستانی ٹیم اب سیریز کے تیسرے میچ کے لیے جوہانسبرگ روانہ ہوگی، جہاں اسے سیریز میں بقا کے لیے ہر صورت جیت درکار ہے۔
