نئی دہلی،پریس ریلیز،ہمارا سماج :جمعیۃ علماء صوبہ دہلی کے زیرِ اہتمام شاہین باغ، دہلی میں ایک شاندار استقبالیہ پروگرام منعقد ہوا، جس میں دہلی بھر سے جمعیۃ علماء کے ذمہ داران، علماء کرام اور کارکنان کی بڑی تعداد نے شرکت کی۔ پروگرام میں تنظیم کے نومنتخب عہدیداران کا پُرجوش خیرمقدم کیا گیا اور آئندہ کے لائحۂ عمل پر تفصیلی گفتگو کی گئی۔ اس اجلاس کی قیادت مولانا محمد یوسف اعظمی نے کی۔استقبالیہ پروگرام میں جمعیۃ علماء صوبہ دہلی کے صدر مولانا قاسم نوری قاسمی، نائب صدر مولانا قاری عارف قاسمی، جمعیۃ علماء چاندنی چوک کے جنرل سکریٹری مولانا ضیاء اللہ قاسمی، جمعیۃ علماء شاہدرہ کے جنرل سکریٹری مفتی گلزار قاسمی ،جمعیۃ علماء جنوبی مشرقی دہلی (اوکھلہ) کے صدر مفتی حسام الدین قاسمی اور جنرل سکریٹری قاری دانش ، مولانا رضوان انجم نائب صدر جمعیۃعلماء شمال مشرقی دہلی ، مفتی فاروقی گنگوہی ، مولانا آصف مصطفی آباد، مولانا قاسم بیہٹہ غازی آباد کا پرتپاک استقبال کیا گیا۔ اس موقع پر علاقے کے ائمہ علماء سمیت مفتی انصار الحق دفتر ناظم تنظیم جمعیۃ علماء صوبہ دہلی بھی شریک تھے۔اسی موقع پر مولانا محمد یوسف اعظمی کو باضابطہ طور پر جمعیۃ علماء صوبہ دہلی کا ناظم مقرر کیے جانے کا اعلان کیا گیا، جس کا حاضرین نے خیرمقدم کرتے ہوئے اس امید کا اظہار کیا کہ ان کی قیادت میں دہلی میں جمعیۃ کی تنظیمی سرگرمیوں کو مزید استحکام حاصل ہوگا۔پروگرام میں دینی تعلیمی بورڈ کے ناظم مولانا شعیب قاسمی نے حالاتِ حاضرہ اور آئندہ پیش آنے والے چیلنجز پر خطاب کیا۔ انہوں نے زور دے کر کہا کہ موجودہ دور میں دینی و ملی تنظیموں کو عوام کے درمیان رہ کر منظم، باشعور اور متحد ہو کر کام کرنے کی اشد ضرورت ہے۔یہ استقبالیہ پروگرام حافظ یوسف اعظمی کی نگرانی اور جمعیۃ علماء ہند، اوکھلہ کی زیرِ سرپرستی منعقد ہوا، جس میں اوکھلہ سمیت دہلی کے مختلف حلقوں کے ذمہ داران اور کارکنان نے شانہ بہ شانہ کھڑے ہو کر بھرپور کردار ادا کیا۔ پروگرام کا اختتام مفتی حسام الدین کی دعا پر ہوا، جس کے بعد مہمانوں نے کھانا تناول فرمایا۔ شرکاء نے اس استقبالیہ پروگرام کو جمعیۃ علماء صوبہ دہلی کے لیے ایک مثبت، امید افزا اور آئندہ سرگرمیوں کے حوالے سے نہایت اہم قدم قرار دیا۔ اس موقع پر جہان سیرت کتاب مصنفہ مولانا محمد اسجد قاسمی کا بھی اجرا عمل میں آیا۔مجلس مفتی حسام الدین کی دعا پر ختم ہوئی ۔
