نئی دہلی: وزیراعظم نریندر مودی کی ماں ہیرابین کا انتقال ہوگیا ہے۔ احمدآباد کے اسپتال میں صبح 3:30بجے انہوں نے آخری سانس لی۔وزیراعظم نریندر مودی نے ٹوئٹ کرتے ہوئے اس بات کی اطلاع دی ہے۔ انہوں نے ٹوئٹ کرتے ہوئے اپنی والدہ ہیرابین کو خراج پیش کرتے ہوئے لکھا کہ میں جب ان سے 100 ویں سالگرہ پر ملا تو انہوں نے ایک بات کہی تھی، جو ہمیشہ یاد رہتی ہے کہ ’کام کرو دماغ سے اور زندگی بسر کرو پاکیزگی سے۔‘ بتادیں کہ وزیر اعظم نریندر مودی کی والدہ ہیرا بین کو بدھ 28 دسمبر کو احمد آباد کے یو این مہتا اسپتال میں داخل کرایا گیا تھا۔ ہیرا بین اس سال 100 سال کی ہو گئی تھیں، انہیں پہلے بھی اسپتال میں داخل کرایا گیا تھا۔ اطلاعات کے مطابق پی ایم مودی کی والدہ کی طبیعت خراب ہونے پر انہیں اسپتال لے جایا گیا تھا۔ بچپن میں اپنی ماں ہیرا بین مودی (Heeraben Modi) کے سامنے آئی ہر مشکلات کو یاد کرتے ہوئے وزیر اعظم مودی نے اس سے پہلے کہا تھا کہ میری ماں جتنی سادہ ہیں، اتنی ہی غیر معمولی ہیں۔ بالکل دوسری تمام ماؤں کی طرح۔ چھوٹی سی عمر میں ہی میری ماں نے اپنی ماں کو کھودیا تھا۔ انہوں نے کہا کہ انہیں میری نانی کا چہرہ یا ان کی گود تک یاد نہیں۔ انہوں نے اپنا پورا بچپن اپنی ماں کے بغیر گزارا ہے۔‘پی ایم مودی نے اس سے پہلے گجرات اسمبلی انتخابات کی مہم چلانے کے بعد گاندھی نگر میں ان کی رہائش گاہ پر اپنی ماں سے ملاقات کی تھی۔
