بلند شہر 30 جنوری،سماج نیوز سروس: پسماندہ مسلم خواتین کانفرنس میں آئی ہوئی مسلم خواتین سے خطاب کرتے ہوئے جاوید ملک نے کہا کہ آج تک کسی وزیر اعظم نے پسماندہ مسلمانوں کا خیال نہیں رکھا۔ نریندر مودی ہندوستان کے پہلے وزیر اعظم ہیں جنہوں نے پسماندہ مسلمانوں کے درد کو سمجھا۔ سیاسی، معاشی اور سماجی طور پر پسماندہ مسلمانوں کو تمام سیاسی جماعتوں نے اپنے فائدے کیلئے استعمال کیااور پسماندہ مسلمانوں کو انکے حال پر چھو ڑ دیا ۔ بی جے پی صحیح معنوں میں پسماندہ مسلمانوں کی خیر خواہ ثابت ہوئی ہے۔ یہ باتیں آل انڈیا پسماندہ مسلم منچ کے قومی صدر اور بی جے پی اقلیتی مورچہ کے علاقائی صدر جاوید ملک نے کہیں۔ وہ گاو¿ں فتح پور دیو میں منعقدہ پسماندہ مسلم کانفرنس سے بطور مہمان خصوصی خطاب کر رہے تھے۔ جاوید ملک نے کانفرنس میں ہزاروں پسماندہ مسلمانوں سے خطاب کرتے ہوئے کہا کہ آج پسماندہ مسلمان حاشیہ پر آگیا تھا لیکن جب سے وزیر اعظم نریند مودی نے سماج کے بارے میں اپنی تشویش کا اظہار کیا ہے پسماندہ سماج کا اعتماد مودی میں مزید گہرا ہوا ہے۔ آزادی کے بعد گزشتہ ستر سالوں میں ملک اور ریاست میں کانگریس، ایس پی اور دیگر اپوزیشن پارٹیوں نے پسماندہ مسلمانوں کو گمراہ کیا ہے۔ مسلم سماج کو صرف ووٹ لینے کیلئے گمراہ کیا جاتا ہے۔ اب ہماری کھوئی ہوئی سیاسی عزت کو واپس لانے، پسماندگی کو دور کرنے کا صحیح وقت ہے، کیونکہ وزیر اعظم نریندر مودی اور وزیر اعلیٰ یوگی آدتیہ ناتھ کی ڈبل انجن والی حکومت نے بغیر کسی تفریق کے پسماندہ مسلم سماج کو سب کا ساتھ سب کا وکاس کا نعرہ دیا ہے۔ اسکیموں کا فائدہ پہنچا کر پسماندگی دور کرنے کا کام کیا ہے۔ پسماندہ مسلم کمیونٹی کو اب کسی بھی مخالف پارٹی سے گمراہ نہیں ہونا چاہیے۔یہ جماعتیں آپ کی پسماندگی کو کبھی دور نہیں کر سکتیں۔ جاوید ملک نے کہا کہ پسماندہ مسلم سماج کوجس طر یقہ سے مراعات سے نوازا گیا ہے اسی طر ح مسلم سماج کو بھی آنے والے انتخابات میں بھارتیہ جنتا پارٹی کو مضبوط کرنے کیلئے کام کرنا چاہیے۔ تا کہ یہ پیغام وزیر اعظم تک پہنچے کہ پسماندہ برادری نے بھی آپ کو ووٹ دیا ہے۔ ملک کے پسماندہ مسلمان آج بھی مودی کے ساتھ کھڑے ہیں اور مستقبل میں بھی کھڑے رہیں گے۔
اس موقع پر پسماندہ مسلم منچ کے علاقائی صدر گلبہار چودھری نے بھی پسماندہ مسلمانوں کیلئے کئے گئے کاموں اور حکومت کے منصوبوں سے آگاہ کیا۔ کانفرنس سے ضلع صدر اور پروگرام کوآرڈینیٹر مسز شہانہ ملک، قومی نائب صدر صغیر پردھان، گلبہار چودھری، مدرسہ بورڈ کے ممبران عمران احمد، راشد ملک، ڈاکٹر عظیم، شارق ضیا ، شاہ کمال پردھان، استخار وغیرہ نے بھی خطاب کیا۔
