راہل کا مودی سے کوئی مقابلہ نہیں: شاہ

بنگلورو،(یو این آئی) مرکزی وزیر داخلہ اور بھارتیہ جنتا پارٹی (بی جے پی) کے سینئر لیڈر امیت شاہ نے منگل کو کانگریس لیڈر راہل گاندھی پر حملہ کرتے ہوئے انڈیا گروپ کو خاندانوں اور بدعنوان لوگوں کا اتحاد قرار دیتے ہوئے کہا کہ وزیر اعظم نریندر مودی کا مسٹر راہل گاندھی سے کوئی مقابلہ نہیں ہے ۔یہاں پارٹی کارکنوں سے خطاب کرتے ہوئے مسٹر شاہ نے کہاکہ”آئندہ عام انتخابات میں ایک طرف وزیر اعظم نریندر مودی کی قیادت میں قومی جمہوری اتحاد (این ڈی اے ) اور بی جے پی ہے اور دوسری طرف یہ ‘خاندان پرستوں’ اور ‘کرپٹ’ لوگوں کا یہ انڈیا گروپ ہے ۔ انہوں نے دعویٰ کیا کہ این ڈی اے ریاست کی تمام 28 سیٹیں جیت لے گی۔ انہوں نے حکمراں کانگریس پر ریاست میں بدعنوانی کو فروغ دینے کا الزام لگایا۔انہوں نے مسٹر مودی کی ایمانداری کی تعریف کی اور دعویٰ کیا کہ ان (مسٹر مودی) کی قیادت میں بی جے پی نے شفافیت کی مثال قائم کی ہے ۔وزیر داخلہ نے کہاکہ ”لوگوں کے پاس واضح انتخاب ہے ۔ ایک طرف مسٹر مودی نے 23 سال تک کرپشن کے بغیر حکومت کی۔ دوسری طرف کانگریس نے 12 لاکھ کروڑ روپے کا گھپلہ کیا ہے ۔ یہ لوگ جہاں بھی اقتدار میں آتے ہیں کرپشن کرتے ہیں۔ ان کا ذہن کبھی عوام کی خدمت پر مرکوز نہیں ہوتا۔