جلگاؤں، پریس ریلیز،ہماراسماج:جمعیۃ علماء ضلع جلگاؤں کے زیرِ اہتمام شہر بودوڑمیں تربیتی کیمپ و جلسہ اصلاح معاشرہ زیر صدارت فخرمہاراشٹر مولانا حافظ محمد ندیم صدیقی صدر جمعیۃ علماء مہاراشٹر منعقد ہوا، جس میں علاقہ بھر سے اراکینِ جمعیۃ و عوام الناس نے شرکت کی۔اجلاس تین حصوں میں منقسم رہا۔ اس پروگرام کا آغاز صبح نو بجےبدست فخر مہاراشٹر مولانا حافظ محمد ندیم صدیقی کےپرچم کشائی سے ہوا، جس کے بعد تربیتی کیمپ مسجد نور ہدایت نگر میں منعقد ہوا۔ تربیتی نشست کے بعد خواتین میں علماء کرام کا خصوصی بیان ہوا، جس میں امہات المؤمنین کی زندگی پر روشنی ڈالی گئی۔بعد نماز مغرب اجلاسِ عام پٹوے ہال میںقاری ظہیرالدین سعادتی کی تلاوت کلام پاک سے آغاز ہوا اورحافظ محمد نبیل سلمہ نے نعت پاک پیش کیا۔ اجلاس سے خطاب کرتے ہوئے صدر جلسہ مولانا ندیم صدیقی نے کہاجمعیۃ علماء صرف ایک تنظیم کا نام نہیں، بلکہ یہ ایک تحریک اور اکابرین کی امانت ہے۔ تربیتی کیمپوں کا مقصد یہ ہے کہ ہمارے کارکنان اپنے اندر تقویٰ، اخلاص اور خدمت کا جذبہ پیدا کریں۔ ایک سچا خادم وہی ہے جو لوگوں کے دکھ درد میں کام آئے اور بغیر کسی تفریق کے انسانیت کی خدمت کرے انہوں نے مزید کہا کہ آج ہمارا معاشرہ فضول خرچی، منشیات اور بے راہ روی جیسی بیماریوں میں گھرا ہوا ہے۔ خاص طور پر شادی بیاہ میں فضول خرچی نے غریبوں کا جینا مشکل کر دیا ہے۔ ہمیں سنتِ نبوی ﷺ کو اپنا کر اپنی زندگیوں کو سادہ اور بابرکت بنانا ہوگا۔ معاشرے کی اصلاح کی شروعات اپنے گھر سے کرنی ہوگی۔اجلاس میں موجود مقرر خصوصی و مبلغ دارالعلوم دیوبند مولانا عرفان قاسمی نےکہا کہ اکابرینِ دیوبند نے ہمیشہ اعتدال اور انسانیت کی خدمت کا سبق دیا ہے۔ ہمیں حجت الاسلام مولانا قاسم نانوتویؒ کے مشن کو آگے بڑھاتے ہوئے علم کی روشنی پھیلانی ہے اور معاشرے سے جہالت اور رسوماتِ بد کا خاتمہ کرنا ہے۔مفتی محمد روشن شاہ قاسمی صدر دینی تعلیمی بورڈ نے اپنے خطاب میں کہاکہ والدین کی ذمہ داری ہے کہ وہ اپنے بچوں کی ایسی تربیت کریں کہ ان کے دلوں میں خوفِ خدا اور فکرِ آخرت پیدا ہو۔ مولانا ابراہیم قاسمی جنرل سکریٹری جمعیۃ علماء مہاراشٹرنے کہاہماری کامیابی کا واحد راستہ اللہ تعالیٰ سے مضبوط تعلق اور نبی کریم ﷺ کی سنتوں پر عمل کرنے میں ہے، مفتی عبدالرحمن اشرفی جنرل سیکریٹری جمعیۃ علماء مراٹھواڑہ نےکہا کہ قرآن ہمیں حقوق اللہ کے ساتھ ساتھ حقوق العبادکی ادائیگی کا سختی سے حکم دیتا ہے۔ ایک سچا مسلمان وہی ہے جس کے ہاتھ اور زبان سے دوسرا انسان محفوظ رہے۔مزید براں جمعیۃ علماء کے علاقائی ذمہ داران اور دیگر علماء کرام نے بھی اجلاس عام کو خطاب کیا جس میں بالخصوص مولانا نور محمد صدر جمعیۃ علماء ضلع جلگاؤں، حافظ انیس کفایتی نائب صدر ضلع جلگاؤں،مولانا محمد عمران قاسمی نائب صدرضلع جلگاؤںشامل تھے ۔اس موقع پر ملی و سماجی خدمات کے اعتراف میں مولانا حافظ محمد ندیم صدیقی کو ان کی بےلوث قیادت پرفدائے ملت اور فخرمہاراشٹر ایوارڈ سے نوازا گیا ، اور مولانا عرفان قاسمی مبلغ دارالعلوم دیوبندکو ان کی علمی و تبلیغی خدمات پر حجت الاسلام مولانا قاسم نانوتوی ایوارڈ پیش کیا گیا۔ آخر میں صدر اجلاس مولانا ندیم صدیقی صاحب کی دعاء پر اجلاس کا اختتام ہوا اورجناب راغب احمدضلع جنرل سکریٹری نے تمام مہمانوں اور حاضرین کا شکریہ ادا کیا ۔اس اجلاس کو کامیاب بنانے میں جمعیۃ علماء جلگاؤں اور شہر بودوڑ کے ذمہ داران اور کارکنان بالخصوص نوجوان طبقہ نےبے انتہا محنت کی اور اپنا قیمتی وقت دیا اللہ ان کو بہترین بدلہ عطافرمائیں۔
