نئی دہلی (یواین آئی) بھارتیہ جنتا پارٹی (بی جے پی) نے آج محترمہ ریکھا گپتا کو دہلی کی نئی وزیر اعلیٰ کے طور پر منتخب کیا۔ پارٹی نے ابھی تک دہلی میں کسی نائب وزیر اعلیٰ کا انتخاب نہیں کیا ہے ۔دہلی اسمبلی انتخابات میں دو تہائی اکثریت کے ساتھ کامیاب ہونے والی بی جے پی دہلی اسٹیٹ ہیڈکوارٹر میں منعقدہ نو منتخب قانون ساز پارٹی کی میٹنگ میں مرکزی مبصر روی شنکر پرساد، اوم پرکاش دھنکھڑ اور انتخابی انچارج بیجنت جے پانڈا کی موجودگی میں محترمہ ریکھا گپتا کو لیڈر منتخب کیا گیا۔پارٹی کے قومی میڈیا کے شریک انچارج سنجے میوکھ نے کہا کہ میٹنگ میں مسٹر پرویش ورما، مسٹر وجیندر گپتا اور مسٹر ستیش اپادھیائے نے محترمہ ریکھا گپتا کے نام کی تجویز پیش کی جسے متفقہ طور پر قبول کرلیا گیا۔ میٹنگ میں کسی کو ڈپٹی چیف منسٹر کے طور پر منتخب نہیں کیا گیا۔بعد ازاں محترمہ ریکھا گپتا نے پارٹی کی قومی قیادت، ایم ایل ایز اور دہلی کے عوام کے تئیں اظہار تشکر کیا۔میٹنگ کے بعد محترمہ گپتا کے ساتھ پارٹی کے دہلی کے ریاستی صدر وریندر سچدیوا اور انچارج بیجینت جے پانڈا اور دیگر قائدین حکومت سازی کا دعویٰ پیش کرنے کے لیے لیفٹیننٹ گورنر وی کے سکسینہ کی رہائش گاہ کے لیے روانہ ہوئے ۔جمعرات کو دوپہر 12.35 بجے ، لیفٹیننٹ گورنر وی کے سکسینہ محترمہ گپتا کو وزیراعلیٰ کے کے عہدے کا حلف دلائیں گے ۔ اس کے بعد کابینہ کے ارکان کو حلف دلایا جائے گا۔ حلف برداری کی تقریب رام لیلا میدان میں منعقد کی جا رہی ہے ۔ تقریب حلف برداری کی نظامت دہلی کے چیف سکریٹری کریں گے ۔ وزیر اعظم نریندر مودی، بی جے پی کے قومی صدر جگت پرکاش نڈا، وزیر داخلہ امت شاہ، مرکزی وزراء اور بی جے پی اور قومی جمہوری اتحاد کی حکومت والی ریاستوں کے وزرائے اعلیٰ اور نائب وزرائے اعلیٰ اور سرکردہ رہنما بھی تقریب میں شرکت کریں گے ۔70 رکنی دہلی اسمبلی میں بی جے پی کو 48 اور عام آدمی پارٹی کو 22 سیٹیں ملی ہیں۔دوسری اور عام آدمی پارٹی کے قومی کنوینر اور دہلی کے سابق وزیر اعلی اروند کیجریوال نے ریکھا گپتا کو وزیر اعلی منتخب ہونے پر مبارکباد دی۔مسٹر کیجریوال نے ایکس پر مبارک باد پیش کرتے ہوئے کہا، ‘‘ریکھا گپتا جی کو دہلی کی وزیر اعلیٰ بننے پر بہت بہت مبارکباد۔ مجھے امید ہے کہ وہ دہلی کے لوگوں سے کیے گئے تمام وعدوں کو پورا کریں گی۔ ہم دہلی کے لوگوں کی ترقی اور بہبود کے ہر کام میں ان کا ساتھ دیں گے ۔اے اے پی کے سینئر لیڈر اور کارگزار وزیر اعلیٰ آتشی نے کہا، "ریکھا گپتا جی کو دہلی کی وزیر اعلیٰ بننے پر مبارکباد۔ یہ خوشی کی بات ہے کہ دہلی کی قیادت ایک خاتون کریں گی۔ مجھے امید ہے کہ دہلی کے لوگوں سے جو وعدے کیے گئے ہیں وہ پورے ہوں گے ۔ دہلی کی ترقی کے لیے آپ کو عام آدمی پارٹی کی مکمل حمایت حاصل رہے گی۔قابل ذکر ہے کہ آج بی جے پی لیجسلیچر پارٹی کی میٹنگ میں ریکھا گپتا کو لیجسلیچر پارٹی کا لیڈر منتخب کیا گیا۔ وہ جمعرات کو دہلی کی چوتھی خاتون وزیر اعلیٰ کے طور پر حلف لیں گی۔
