محمد نعمت اللہ
پٹنہ ،سماج نیوز سروس: بہار کے نائب وزیر اعلیٰ وجے کمار چودھری کی آج جنتا دل یونائیٹڈ کے متحرک لیڈر اور ایم ایل سی ڈاکٹر خالد انور کی سرکاری رہائش گاہ پرآمد ہوئی، جہاں ڈاکٹر خالد انور نے ان کا پرتپاک استقبال کیا۔ اس موقع پر ارریہ، پورنیہ اور کشن گنج سمیت ریاست کے مختلف اضلاع سے آئے ہوئے سماجی، تعلیمی و ملی اداروں کے درجنوں ذمہ داران اور سرکردہ شخصیات موجود تھیں، جنہوں نے نائب وزیر اعلیٰ سے ملاقات کی اور تفصیلی تبادلہ خیال کیا ۔ نائب وزیر اعلیٰ وجے کمار چودھری اور ڈاکٹر خالد انور نے مختلف اضلاع سے آئے وفود کے ساتھ بند کمرے میں ایک اہم اور تفصیلی میٹنگ کی۔ اس میٹنگ میں مسلم معاشرے کو درپیش سماجی، سیاسی، تعلیمی اور دیگر عوامی مسائل پر کھل کر بات چیت ہوئی۔ وفد میں شامل سرکردہ لوگوں نے اپنے اپنے علاقوں کے مسائل نائب وزیر اعلیٰ کے سامنے رکھے، جس پر انہوں نے ہمدردانہ غور کرنے کی یقین دہانی کرائی۔ اس ملاقات کے دوران وفود سے اپیل کرتے ہوئے نائب وزیر اعلیٰ وجے کمار چودھری نے کہا کہ بہار میں نتیش کمار کے طرز عمل پر قانون کی حکمرانی قائم ہے۔ یہاں کسی بھی طبقے، بالخصوص اقلیتوں کو گھبرانے، مایوس ہونے یا پریشان ہونے کی بالکل ضرورت نہیں ہے۔ حکومت ہر شہری کی جان، مال اور عزت کے تحفظ کے لیے پوری طرح پابند عہد ہے۔بعد ازاں میڈیا نمائندوں سے گفتگو کرتے ہوئے وجے کمار چودھری نے کہا کہ ملک اور ریاست کی سیاسی فضا تیزی سے بدل رہی ہے۔ انہوں نے دعویٰ کیاکہ اقلیتی سماج اس وقت این ڈی اے کی ترقیاتی پالیسیوں سے شدید متاثر ہے اور ہماری طرف امید بھری نگاہوں سے دیکھ رہا ہے۔ جن سیاسی جماعتوں نے مسلمانوں کو دہائیوں تک فریب کے جال میں پھنسا کر صرف ووٹ بینک کے طور پر استعمال کیا، اب مسلم سماج ان کی حقیقت کو سمجھ چکا ہے۔ اب مسلمانوں کو معلوم ہے کہ ان کا اصل ہمدرد اور حمایتی کون ہے اور انہیں کس کے ساتھ کھڑا ہونا چاہیے۔ انہوں نے مزید کہا کہ اب ملک بھر کے مسلمانوں نے دھوکہ دینے والے عناصر اور نام نہاد سیکولر رہنماؤں کو سائیڈ لائن کرنے کا پورا موڈ بنا لیا ہے۔اس موقع پر جے ڈی یو کے سینئر رہنما و ایم ایل سی ڈاکٹر خالد انور نے کہا کہ جنتا دل یونائیٹڈ ایک خالص سماجوادی نظریہ کی حامل پارٹی ہے، جہاں سبھی طبقات کے ساتھ یکساں انصاف کیا جاتا ہے۔ انہوں نے نائب وزیر اعلیٰ کی ستائش کرتے ہوئے کہا کہ وجے کمار چودھری ان چنیدہ رہنماؤں میں شامل ہیں جنہوں نے ریاست میں سماجی برابری، سماجی انصاف اور بھائی چارے کے قیام کے لیے شروع سے طویل جدوجہد کی ہے۔ اردو زبان کا معاملہ ہو، مسلمانوں کی تہذیب و ثقافت کی بقا ہو یا ان کے وقار اور حقوق کی حفاظت کا سوال— وجے کمار چودھری نے ہمیشہ وزیر اعلیٰ نتیش کمار کے ساتھ کندھے سے کندھا ملا کر اقلیتوں کے حق میں تاریخی فیصلے کروائے ہیں۔ ڈاکٹر خالد انور نے عزم ظاہر کیا کہ جے ڈی یو اور اس کی قیادت بہار کے تمام طبقات کی ترقی اور خوشحالی کے لیے مستقبل میں بھی نتیش کمار کے نقش قدم پر چل کر سبھی طبقوں کی فلاح کیلئے کام کرتی رہے گی۔
