لاہور، (یو این آئی) پاکستان کے ابھرتے ہوئے اوپنر صاحبزادہ فرحان نے کہا ہے کہ پہلے وہ کارکردگی کے دباؤ میں کھیلتے تھے، تاہم اب کرکٹ کو انجوائے کرنے سے ان کی کارکردگی میں واضح بہتری آئی ہے۔اسپورٹس ویب سائٹ کرک انفو کو دیے گئے انٹرویو میں صاحبزادہ فرحان نے کہا کہ ذہنی طور پر خود کو آزاد رکھنے اور کھیل سے لطف اندوز ہونے کی وجہ سے ان کے نتائج بہتر ہوئے ہیں۔انہوں نے اسٹیو اسمتھ کے ساتھ اوپننگ کو اپنے لیے اعزاز قرار دیتے ہوئے کہا کہ وہ ایک بڑے کھلاڑی ہیں اور ان کے ساتھ کھیل کر انہیں بہت کچھ سیکھنے کا موقع مل رہا ہے۔صاحبزادہ فرحان نے اعتراف کیا کہ افتخار احمد اور کوچ عبدالرحمان کے مشوروں نے ان کے کھیل میں نمایاں بہتری لانے میں اہم کردار ادا کیا، خاص طور پر ان کے اسٹرائیک ریٹ اور پاور ہٹنگ میں اضافہ ہوا۔انہوں نے بتایا کہ وہ اپنی کارکردگی کو بہتر بنانے کے لیے روزانہ سخت پریکٹس کرتے ہیں اور مسلسل سیکھنے کے عمل میں مصروف ہیں۔واضح رہے کہ صاحبزادہ فرحان نے 2025 کے آغاز سے ٹی ٹوئنٹی کرکٹ میں غیر معمولی کارکردگی کا مظاہرہ کرتے ہوئے سب سے زیادہ رنز اور چھکے لگانے کا اعزاز حاصل کیا ہے۔ٹیم میں واپسی کے بعد انہوں نے 1219 رنز 35.85 کی اوسط اور 140 سے زائد اسٹرائیک ریٹ کے ساتھ اسکور کیے، جبکہ ٹی ٹوئنٹی ورلڈ کپ میں 383 رنز بنا کر نیا ریکارڈ بھی قائم کیا۔ان کی یہ کامیابی ڈومیسٹک کرکٹ میں شاندار کارکردگی کے بعد ممکن ہوئی، جہاں انہوں نے نیشنل ٹی ٹوئنٹی کپ میں 605 رنز بنا کر سب کو متاثر کیا اور سلیکٹرز کی توجہ حاصل کی۔
