ریاض(ہ س)۔سعودی عرب میں عمومی ادارہ شماریات (جنرل اتھارٹی فار اسٹیٹ اسٹکس) نے منگل کے روز اعلان کیا کہ حج 1446ھ / 2025ء کے دوران حجاج کی خدمت کے لیے سرکاری و نجی شعبوں سمیت سیکورٹی اداروں سے تعلق رکھنے والے افراد کی مجموعی تعداد 4 لاکھ 20 ہزار 70 رہی۔ ان افراد نے کْل 16 لاکھ 73 ہزار 230 مرد و خواتین حجاج کی خدمت انجام دی۔ادارے نے واضح کیا کہ خدمات انجام دینے والوں میں مردوں کا تناسب 92 فی صد جب کہ خواتین کا تناسب 8 فی صد رہا۔ مقدس مقامات میں مرد و خواتین رضاکاروں کی تعداد 34 ہزار 540 رہی، جنھوں نے اس سال حج سیزن میں مجموعی طور پر 21 لاکھ 34 ہزار 398 رضاکارانہ گھنٹوں کی خدمت انجام دی۔ ادارے کی رپورٹ کے مطابق اس سال "روڈ ٹْو مکہ” پروگرام سے مستفید ہونے والے حجاج کی تعداد 3 لاکھ 14 ہزار 337 رہی، جو بیرون ملک سے آنے والے کل حجاج کا 20.9 فی صد ہے۔ یہ پروگرام 2017ء کے حج سیزن سے شروع کیا گیا تھا جس کا مقصد بیرون ملک سے آنے والے حجاج کی آمد کو سہل بنانا ہے۔واضح رہے کہ ادارہ شماریات نے یوم عرفہ کے موقع پر اعلان کیا تھا کہ رواں سال حجاج کی کل تعداد 16 لاکھ 73 ہزار 230 رہی، جن میں سے 15 لاکھ 6 ہزار 576 افراد بیرون ملک سے مختلف راستوں سے آئے، جب کہ اندرون ملک سے شہریوں اور مقیمین پر مشتمل 1 لاکھ 66 ہزار 654 حجاج شامل تھے۔اعداد و شمار کے مطابق مرد حجاج کی مجموعی تعداد 8 لاکھ 77 ہزار 841 جب کہ خواتین حجاج کی مجموعی تعداد 7 لاکھ 95 ہزار 389 رہی۔یہ بات بھی قابل ذکر ہے کہ ادارہ شماریات نے اس سال کی حج رپورٹ کو وزارت داخلہ کے انتظامی ریکارڈ کی بنیاد پر مرتب کیا، جس میں حجاج کی تفصیلی خصوصیات اور حج کے دائرہ وقت و مقام میں فراہم کی گئی خدمات شامل تھیں۔ یہ تمام معلومات تجزیے اور جدول بندی کے بعد جاری کی گئیں، جو گزشتہ پانچ برسوں سے اختیار کردہ شماریاتی طریقہ کار کے مطابق ہے۔
