نئی دہلی ( سماج نیوز سروس) عام آدمی پارٹی نے اعلان کیا تھا کہ وہ ہریانہ کی تمام 90 اسمبلی سیٹوں پر الیکشن لڑے گی۔اسی سلسلے میں دہلی کے وزیر اعلیٰ اروند کیجریوال کی اہلیہ سنیتا کیجریوال آج بروز ہفتہ کو پنچکولہ سے اس مہم کا آغاز کریں گی۔اس دوران وہ ہریانہ کے عوام کے سامنے کیجریوال کی ضمانت بھی پیش کریں گی۔ پارٹی کے تمام سینئر رہنما ان کے ساتھ موجود ہوں گے۔ پنجاب کے وزیر اعلی بھگونت مان بھی موجود ہوں گے۔ اس کے ساتھ ہی ہریانہ میں بھی اسمبلی انتخابی مہم شروع ہو جائے گی۔ تفصیلات کے مطابق سنیتا کیجریوال کے ساتھ پنجاب کے وزیر اعلی بھگونت مان، آپ کے قومی جنرل سکریٹری (تنظیم) سندیپ پاٹھک اور راجیہ سبھا کے رکن سنجے سنگھ بھی ہوں گے۔ واضح ہو کہ دہلی کے وزیر اعلی اور عام ادمی پارٹی کنوینر اس وقت دہلی ایکسائز پالیسی کیس میں عدالتی حراست میں ہیں۔ آپ کو بتاتے چلیں کہ سنیتا کیجریوال نے حالیہ لوک سبھا انتخابات میں دہلی، ہریانہ اور گجرات میں پارٹی امیدواروں کے لیے بھرپور مہم چلائی تھی۔یا د رہے کہ عام آدمی پارٹی نے منگل کو اعلان کیا کہ وہ ہریانہ کی تمام 90 اسمبلی سیٹوں پر مقابلہ کرے گی۔
