بھاگلپور (قمر امان) بیہہ پور میں واقع عظیم روحانی مرکز حضرت سیدنا داتا منگن شاہ رحمۃ اللہ علیہ کے مزارِ اقدس پر بھارتیہ جنتا پارٹی کے سابق مرکزی وزیر، بھاگلپور کے سابق رکنِ پارلیمان اور قومی ترجمان سید شہنواز حسین نے حاضری دے کر چادر پوشی کی اور گہری عقیدت و محبت کا اظہار کیا۔اس موقع پر انہوں نے مزار شریف کی روحانی عظمت اور بزرگانِ دین کی تعلیمات کو خراجِ عقیدت پیش کرتے ہوئے کہا کہ حضرت سیدنا داتا منگن شاہ رحمۃ اللہ علیہ بلند پایہ بزرگ اور صاحبِ فیض ہستی تھے جن کی تعلیمات آج بھی انسانیت کے لیے مشعلِ راہ ہیں۔انہوں نے مزید کہا کہ وہ گزشتہ کئی دہائیوں سے اس مقدس مقام پر حاضری دیتے آ رہے ہیں اور یہاں کی روحانیت دل کو سکون اور ایمان کو تازگی عطا کرتی ہے۔سید شہنواز حسین کے ہمراہ اقلیتی مورچہ بھاجپا کے ریاستی صدر قمر الزمان انصاری، معروف سماجی کارکن ضیاء الرحمن انصاری،محمد قربان سمیت برادرانِ وطن اور بھاجپا و جدیو سے وابستہ معزز شخصیات کی بڑی تعداد موجود تھی،جنہوں نے مزار شریف پر حاضری دے کر ملک میں امن،بھائی چارہ اور خوشحالی کے لیے دعا کی۔اس موقع پر مزار انتظامیہ کمیٹی کے صدر محمد عرفان عالم،نائب صدر کونین خان فریدی،نائب صدر اسد راہی،سکریٹری محمد ابوالحسن، جوائنٹ سکریٹری محمد شہاب الدین،خازن زین العابدین انصاری، محمد سہراب،محمد نثار عالم، محمد تبریز اور شاہ گلشن سمیت دیگر ذمہ داران نے سید شہنواز حسین اور ان کے رفقاء کا پرتپاک استقبال کیا اور انہیں شال پیش کر کے اعزاز بخشا۔مزار انتظامیہ کمیٹی کے صدر شعبہ محمد عرفان عالم نے اپنے بیان میں کہا کہ حضرت داتا منگن شاہ رحمۃ اللہ علیہ کا دربار ہمیشہ سے محبت، رواداری اور انسانیت کی خدمت کا مرکز رہا ہے،جہاں ہر مذہب اور طبقے کے لوگ یکساں عقیدت کے ساتھ حاضر ہوتے ہیں،جو ہماری گنگا جمنی تہذیب کی خوبصورت مثال ہے۔انہوں نے سید شہنواز حسین کی آمد پر مسرت کا اظہار کرتے ہوئے کہا کہ عوامی نمائندوں کی ایسی روحانی مراکز پر حاضری سماجی ہم آہنگی کو مزید مضبوط بناتی ہے۔تقریب کے اختتام پر ملک و ملت کی سلامتی،ترقی اور باہمی اتحاد کے لیے خصوصی دعا کی گئی جس میں بڑی تعداد میں عقیدت مندوں نے شرکت کی۔
