نیویارک ( آئی این ایس انڈیا )
ناساؤ کاونٹی انٹرنیشنل کرکٹ اسٹیڈیم میں آئی سی سی منز ٹی20 ورلڈ کپ 2024 کے گروپ اے میں ہندوستان اور آئرلینڈ کے درمیان ایک میچ بدھ کو کھیلا جائے گا۔ ہندوستانی ٹیم نے آج میچ سے ایک دن پہلے پریکٹس سیشن میں حصہ لیا۔ہندوستانی ٹیم نے آئرلینڈ کیخلاف میچ سے قبل پریکٹس سیشن میں کافی پسینہ بہایا۔ جسپریت بمراہ، محمد سراج اور ہاردک پانڈیا نے نیٹ میں اچھی گیند بازی کی۔ روہت شرما چائنا مین بالر کلدیپ یادو کو پریکٹس کرتے نظر آئے۔ ساتھ ہی سوریہ نے بڑے شاٹس کھیلنے کی مشق بھی کی۔ یشسوی جیسوال کے ساتھ رنکو سنگھ نے بھی پریکٹس سیشن میں زبردست بلے بازی کی۔ٹی ٹوئنٹی ورلڈ کپ کی تاریخ میں سب سے زیادہ رنز بنانے والے ہندوستان کے اسٹار بلے باز وراٹ کوہلی نے بھی میچ سے قبل بھرپور مشق کی۔ وراٹ نے نیٹ میں تجربہ کار گیند باز جسپریت بمراہ کا سامنا کیا۔ اس دوران انہیں کور ڈرائیوز کی مشق کرتے ہوئے دیکھا گیا۔ کوہلی کو یجویندر چہل کی گیندوں کا سامنا کرتے ہوئے بھی دیکھا گیا۔ہندوستان اور آئرلینڈ کے درمیان ٹی 20 انٹرنیشنل میں اعدادوشمار کی بات کریں تو دونوں ٹیموں کے درمیان اب تک کل 8 میچ کھیلے جا چکے ہیں۔ اس دوران ہندوستانی ٹیم حاوی رہی۔ ٹیم انڈیا نے 8 میں سے 7 میچ جیتے ہیں۔ دونوں ٹیموں کے درمیان ایک میچ منسوخ رہا۔ دونوں ٹیمیں ٹی ٹوئنٹی ورلڈ کپ میں ایک بار آمنے سامنے آ چکی ہے جس میں بھارت نے کامیابی حاصل کی ہے۔نیویارک میں واقع ناساو انٹرنیشنل کرکٹ اسٹیڈیم کی پچ پر بیٹنگ آسان نہیں ہے۔ یہاں کی پچ پر رفتار، اچھال ہے۔بڑا آؤٹ فیلڈ ہے۔ اضافی باؤنس کی وجہ سے یہ گیند بازوں کے لیے مدد گار اور بلے بازوں کے لیے ایک ڈراؤنا خواب ہے۔سری لنکا اور جنوبی افریقہ کے درمیان کھیلے گئے ٹی ٹوئنٹی ورلڈ کپ کے چوتھے میچ میں دونوں ٹیموں کے بلے بازوں نے 35.3 اوورز کھیلے۔ ایسے میں آج کا میچ جیتنے کے لیے ہندوستانی بلے بازوں کے لیے رنز بنانا ضروری ہے۔
