ایران اور امریکہ کے درمیان عارضی جنگ بندی کے خاتمے کے خدشات اور اسلام آباد میں دونوں ممالک کے درمیان متوقع مذاکرات کے دوسرے دور کے پیش نظر ایک اعلیٰ ایرانی عہدیدار نے انکشاف کیا ہے کہ ایٹمی پروگرام پر اختلافات اب بھی برقرار ہیں اور فریقین کے درمیان خلیج کم نہیں ہو سکی ہے۔پیر کے روز مذکورہ ذرائع نے مزید کہا کہ میزائل پروگرام سمیت ایران کی دفاعی صلاحیتیں ایسے امور ہیں جن پر امریکہ کے ساتھ کوئی سمجھوتہ نہیں کیا جائے گا۔انہوں نے کہا کہ امریکہ اور ایران کے درمیان جنگ بندی کی مدت ختم ہونے کے قریب ہے اور آبنائے ہرمز میں امریکی محاصرے کا تسلسل پاکستان میں ہونے والے امن مذاکرات کو نقصان پہنچا رہا ہے۔اسی تناظر میں باخبر ذرائع نے واضح کیا ہے کہ پاکستان سے واشنگٹن اور تہران کے ساتھ اپنے سفارتی رابطے تیز کر چکا ہے تاکہ کل منگل تک مذاکرات کی بحالی کو یقینی بنایا جا سکے۔ایک پاکستانی سکیورٹی ذریعے نے انکشاف کیا ہے کہ آرمی چیف جنرل عاصم منیر نے امریکی صدر ڈونلڈ ٹرمپ سے بات کی ہے اور انہیں آگاہ کیا ہے کہ ایرانی بندرگاہوں کا محاصرہ مذاکرات کی راہ میں بڑی رکاوٹ ہے۔ رائیٹرز کے مطابق ڈونلڈ ٹرمپ نے جواب دیا کہ وہ اس مشورے کو مدنظر رکھیں گے۔دوسری جانب ایرانی وزارت خارجہ کے ترجمان اسماعیل بقائی نے زور دیا ہے کہ فی الحال امریکہ کے ساتھ مذاکرات کے دوسرے دور کا کوئی منصوبہ نہیں ہے اور انہوں نے امریکی مطالبات کو غیر سنجیدہ اور غیر حقیقت پسندانہ قرار دیا۔انہوں نے اس بات پر بھی زور دیا کہ ان کا ملک کسی بھی صورت میں اعلیٰ افزودہ یورینیم کے ذخائر کی منتقلی یا میزائل پروگرام کے مسئلے پر بحث نہیں کرے گا۔واضح رہے کہ امریکی صدر نے گذشتہ روز ایران کو متنبہ کیا تھا کہ اگر تہران نے ان کی شرائط تسلیم نہ کیں تو ان کا ملک ایران کے تمام پلوں اور بجلی گھروں کو تباہ کر دے گا تاہم انہوں نے یہ بھی واضح کیا کہ دو ہفتوں پر محیط جنگ بندی ختم ہونے سے قبل ان کے نمائندے آج پیر کی شام اسلام آباد پہنچ جائیں گے۔
دو پاکستانی سکیورٹی ذرائع نے انکشاف کیا ہے کہ رائیٹرز کے مطابق گذشتہ روز دوپہر کے وقت امریکی وفد کی آمد کی تیاری کے سلسلے میں دو بڑے امریکی مال بردار سی-17 طیارے سکیورٹی آلات اور گاڑیوں کے ساتھ ایک ایئربیس پر اترے ہیں۔
دریں اثنا وفاقی دارالحکومت اسلام آباد کی انتظامیہ نے شہر میں پبلک ٹرانسپورٹ اور بھاری ٹریفک کی نقل و حرکت روک دی ہے اور سیرینا ہوٹل کے قریب خاردار تاریں لگا دی گئی ہیں جہاں گذشتہ ہفتے مذاکرات ہوئے تھے۔ ہوٹل انتظامیہ نے تمام مہمانوں کو وہاں سے جانے کی ہدایت کر دی ہے۔یاد رہے کہ ایک ہفتہ قبل اسلام آباد میں ایرانیوں اور امریکیوں کے درمیان طویل براہ راست مذاکرات کا پہلا دور ہوا تھا جو کسی نتیجے پر ختم نہیں ہو سکا تھا تاہم گذشتہ کئی روز سے پاکستان دونوں ممالک کے نقطہ نظر کو قریب لانے کے لیے اپنی کوششیں جاری رکھے ہوئے ہے۔
