ٹیکساس (امریکہ)، (یو این آئی) ہندوستانی ایتھلیٹ تیجسون شنکر نے ڈیوڈ نوبل ریلے 2026 ایتھلیٹکس میٹ میں اپنے ڈیکاٹھلون سیزن کا شاندار آغاز کیا۔ انہوں نے 7947 پوائنٹس کا نیا ’وینڈ اسسٹڈ‘ (ہوا کی مدد سے بنا) پرسنل بیسٹ اسکور بنا کر یہ مقابلہ جیت لیا۔اگرچہ ٹیکساس میں تیجسون کا اسکور موجودہ نیشنل ریکارڈ (7826 پوائنٹس) سے بہتر تھا—جو انہوں نے خود گزشتہ سال پولینڈ میں بنایا تھا—لیکن ورلڈ ایتھلیٹکس کے ضابطے کے مطابق، اسے ریکارڈ تسلیم نہیں کیا جائے گا۔ اس کی وجہ یہ ہے کہ اس دوران ہوا کا بہاؤ (ٹیل ونڈ) مقررہ حد سے زیادہ تھا۔ سال 2010 میں نافذ ہونے والے ورلڈ ایتھلیٹکس کے ضابطے کے تحت ڈیکاٹھلون جیسے ’کمبائنڈ ایونٹس‘ میں دکھائی گئی کارکردگی کو ریکارڈ تب ہی مانا جائے گا، جب 100 میٹر دوڑ، لمبی چھلانگ اور 110 میٹر رکاوٹی دوڑ میں ہوا کی اوسط رفتار 2.0 میٹر فی سیکنڈ سے زیادہ نہ ہو۔لیکن تیجسون شنکر کے معاملے میں، ٹیکساس میں 100 میٹر دوڑ کے دوران ہوا کی رفتار پلس 4.7 میٹر فی سیکنڈ تھی، لمبی چھلانگ میں 4.5 میٹر فی سیکنڈ اور 110 میٹر رکاوٹی دوڑ میں 2.5 میٹر فی سیکنڈ تھی۔ اس طرح اوسط رفتار 3.9 میٹر فی سیکنڈ ہو گئی، جس کی وجہ سے ان کی اس کارکردگی کو ریکارڈ کے طور پر تسلیم نہیں کیا جا سکے گا۔ٹیکساس میں ہونے والی اس میٹ کے دوران، تیجسون شنکر نے 100 میٹر دوڑ (10.59)، لمبی چھلانگ (7.66 میٹر)، شاٹ پٹ (13.98 میٹر) اور پول والٹ (4.35 میٹر) میں بھی اپنے کیریئر کی اب تک کی بہترین کارکردگی (پرسنل بیسٹ) کا مظاہرہ کیا۔
