1500روپے کے لئے قتل کرنے والا ملزم گرفتار
نئی دہلی 26دسمبر، سماج نیوز سروس:محض 1500 روپے کے لئے چاقو سے حملہ کرکے ایک شخص کا قتل کردیا گیا ۔ حالانکہ ملزم کو پنجابی باغ تھانہ کے مادی پور پولس چوکی نے سی سی ٹی وی فٹیج اور ٹیکنیکل سرولانس کی مدد سے گرفتار کرلیا ہے ۔ ڈی سی پی مغربی ضلع وچتر ویر کے مطابق گرفتار ملزم کی شناخت محمد عبداللہ کی شکل میں ہوئی ہے ۔ وہ جنتا فلیٹ پچھم وہار کا رہنے والا ہے ۔ اس کے پاس سے پولس نے واردات میں استعمال چاقو ،خون سے سنا کپڑا اور جوتے وغیرہ برآمد کئے ہیں۔ وہ پیشے سے الیکٹرانک ،گزٹ رپیئر کرنے کا کام کرتا تھا۔ ملزم عبداللہ پر 22دسمبر کو ونود اور بنو کا چاقو سے حملہ کرکے قتل کرنے کا الزام تھا کیونکہ ان کے درمیان پیسوں کے لین دین پر تنازعہ چل رہا تھا۔ پولس کے مطابق جانچ میں پتہ چلا ہے کہ عبداللہ نے ونود سے 1500روپے ادھار لئے تھے اور وہ ادا نہیں کرپارہا تھا ۔ قتل کی واردات سے ایک دن پہلے ونود اپنی رقم لینے عبداللہ کے گھر گیا تھا۔ لیکن وہ نہیں ملا تو اس نے غصہ میں اس کے گھر والوں کو برا بھلا کہا اور واپس گھر آگیا۔ عبداللہ جب بعد میں اپنے گھر گیا تو اسے پتہ چلا اور اس نے بے عزتی محسوس کی ۔ اگلے روز وہ ونود کے گھر گیا اور اس سے جھگڑا کرنے لگا ،اسی دوران اس نے ونود پر چاقو سے حملہ کردیا۔
