شمالی ہند کی تینوں ریاستوں کے انتخابی نتیجے حیران کن بھی ہیں اور مایوس کن بھی

حیران کن اس معنی میں کہ راجستھان کی گہلوت سرکار کی فلاحی اسکیموں کی ان کے مخالفین بھی تعریف کئے بغیر نہیں رہ سکے ۔ چرنجیوی سواستھ یوجنا میں عام آدمی کو 25 لاکھ تک (جو اب بڑھا کر پچاس لاکھ تک کردیا گیا تھا) مفت علاج کی سہولت مہیا تھی تعلیم کے میدان‌ میں سیکڑوں کالج اور اسکول کھولے گئے

کسانوں کے لئے فلاحی اسکیمیں گھروں میں سو یونٹ تک بجلی مفت بزرگوں کو پنشن بے روزگاروں کو بیروزگاری بھتہ سرکاری ملازمین کو او پی ایس اور ایسی بیسیوں اسکیمیں عوام میں مقبول تھیں حکومت پر کرپشن کے بڑے الزامات بھی نہیں لگائے جاسکے تھے اس کے باوجود بیشتر وزراء کی شرمناک ہار سمجھ سے پرے ہے کہا جارہا ہے کہ خود جیتنے والوں کو بھی ایسی جیت کا اندازہ نہیں تھا

تو کیا اب یہ سمجھا جائے کہ عوام کے نزدیک اب عوامی فلاح وبہبود سے زیادہ اہم کچھ دیگر امور ہیں  یا عوام کی ترجیحات میں اب ترقیاتی منصوبے یا شہری سہولیات نہیں بلکہ عوامی مزاج کچھ اور چاہتا ہے جو گہلوت حکومت نہیں دے سکی

 کیا یہ ترجیحات مذہبی امور سے متعلق ہیں جبکہ گہلوت سرکار نے ہندو مذہبی جذبات کی تسکین کے لئے بھی  کوئی کم کام نہیں کئے گائے کے گوبر کو دو روپئے کلو کی در سے گائے پالکوں سے خریدنے کی اسکیم اسی کا حصہ ہے۔  گؤ شالاؤں کا بجٹ اقلیتی بہبود کے بجٹ سے کئی گنا زیادہ ہے اسلئے یہ نہیں کہا جاسکتا کہ یہ ترجیحات مذہبی امور سے متعلق تھیں   تو پھر کیا ہیں یہ ترجیحات جن کی بنیاد پر عوام نے نسبتاً ایک صاف ستھری شبیہ کی حکومت کو شرمناک ہار کا تحفہ دیکر رخصت کر دیا

اگر غور سے دیکھیں تو انتخابی مہم کے دوران مرکزی رہنماؤں کی زبان اور سیاسی مہنتوں کے زہریلے نعرے بالکناتھ سے لیکر آچاریہ تک کے بول یہ سمجھنے کے لئے کافی ہیں کہ عوام کی ترجیحات اب کیا ہیں

 مدھیہ پردیش کی صورتحال  بھی اس سے مختلف نہیں ہے غیر اخلاقی جوڑ توڑ سے بنی شوراج سرکار کے پاس دکھانے کے لئے کچھ بھی نہیں تھا لاڈلی بہنا اسکیم بھی انتخابی عمل کے درمیان لائی گئ اینٹی انکمبینسی کی رپورٹ مسلسل میڈیا میں زیر بحث تھی خود شوراج سنگھ چوہان کو مرکزی قیادت نے عملاً نظر انداز کردیا تھا مگر نتائج امیدوں کے برخلاف بی جے پی کے حق میں آنا بجا طور پر حیران کن ہے تیسرے صوبے کی کہانی بھی اس سے مختلف نہیں ہے

یہ نتائج حیران کن کے ساتھ ساتھ مایوس کن بھی ہیں ان نتائج نے نہ صرف ہندی بیلٹ پر بلکہ پورے ملک پر جارحانہ قوم پرستی کی پکڑ کو مزید مضبوط کردیا ہے

ان نتائج کا اثر پارلیمان کے انتخابات پر نہیں پڑیگا ایسا ماننے کے لیے کوئی مضبوط بنیاد میرے پاس نہیں ہے ان نتائج کا ایک منطقی نتیجہ یہ بھی ہوگا کہ کانگریس بحیثیت ایک سیکولر طاقت مزید کمزور ہوگی۔ یہ خیال عام ہوگا کہ بی جے پی کو روک پانے کی اہلیت اب کانگریس میں نہیں ہے ۔ سیکولر جماعتوں کی قیادت اب کانگریس کے بجائے کسی اور جماعت کو دیے جانے کا دباؤ بھی بڑھے گا

یہ نتائج عام ہندوستانی کے لئے تو مایوس کن ہو سکتے ہیں مگر ایک مسلمان کے لئے آنکھیں کھول دینے والے ہیں وہ شخص جس نے نرم ہندو واد کے سہارے حکومت میں رہنا چاہا اسے عوام نے ریجکٹ کرکے سخت گیر موقف رکھنے والوں کو ترجیح دی

راجستھان جیسے نسبتاً پرامن خطے میں مزاجوں کی یہ تبدیلی مستقبل میں ہوا کے رخ کا پتہ دے رہی ہے  لیکن اس کا ایک خوش آئند پہلو  بھی ہے ۔ مسلمان اب تک کانگریس کو اپنا مسیحا مانتے رہے ہیں اس کے ہوتے ہوئے کسی متبادل پر غور کرنا بھی گوارا نہیں کیا جاتا ۔ 70فیصد مسلم آبادی والے حلقہء انتخاب میں بھی اگر کوئی مسلم سیاسی جماعت اپنا امید وار کھڑا کرتی ہے تو اسے کانگریس کو ہرانے کی کوشش کی طرح دیکھا جاتا ہے

کانگریس مسلمانوں میں زمینی سیاسی قیادت کو کھڑا ہوتا دیکھنا پسند نہیں کرتی وہ غیر معروف اور زمینی طور پر غیر مؤثر سیاسی جماعتوں سے تو انتخابی سمجھوتہ کرلیتی ہے مگر مسلم بیس کسی سیاسی جماعت سے اس طرح کے سمجھوتوں سے عملاً سختی سے پرہیز کرتی ہے مسلمانوں میں زمینی رہنماؤں کے بجائے پیراشوٹ قسم کی قیادت کو پروان چڑھایا جاتا ہے جو مسلم قوم سے زیادہ اپنے سرپرستوں کی وفادار ہوتی ہے

اس لئے ان نتائج  کو شر میں خیر کے پہلو کی طرح دیکھتے ہوئے آنے والے پارلیمانی انتخابات کی حکمت عملی تیار کرنے میں اپنی صلاحیتیں صرف کرنی چاہیے

چند ماہ بعد  ہونے والے پارلیمانی انتخابات  ملک  کے مستقبل کے لئے ایک اہم موڑ ثابت ہوسکتے ہیں اگر مسلمان مناسب حکمت عملی کے ساتھ اپنا سیاسی وزن  محسوس کرادیں تو مستقبل میں ایک مؤثر کردار کی امید کی جاسکتی ہے ۔