غزہ میں انسانی صورتِ حال ’سنگین تشویش‘ کا باعث ہے: امریکی محکمہ خارجہ

واشنگٹن:امریکی محکمہ خارجہ نے جمعے کو کہا کہ وہ ایک حالیہ رپورٹ کا جائزہ لے رہا ہے جس میں اقوامِ متحدہ نے غزہ میں قحط کا اعلان کیا۔ محکمے نے مزید کہا کہ وہاں کی انسانی صورتِ حال سنگین تشویش” کا باعث ہے۔محکمہ خارجہ کے ترجمان نے کہا، "غزہ میں انسانی صورتِ حال ایک سنگین تشویش ہے۔ ہم ایک فعال جنگی زون میں معصوم لوگوں تک امداد پہنچانے کے طریقے تلاش کرنے کے لیے تندہی سے کام کر رہے ہیں جہاں لوٹ مار کا سنگین مسئلہ، قیدیوں کا بحران اور ایک وحشیانہ دہشت گرد تنظیم ہے جو اقتدار میں رہنے کے لیے کچھ بھی کر سکتی ہے۔”اقوامِ متحدہ نے جمعہ کے روز باضابطہ طور پر غزہ میں قحط کا اعلان کیا جو شرقِ اوسط میں ایسا اولین واقعہ ہے اور ماہرین نے کہا ہے کہ 500,000 افراد کو تباہ کن” بھوک کا سامنا ہے۔محکمہ خارجہ کے ترجمان نے انٹیگریٹڈ فوڈ سیکیورٹی فیز کلاسیفیکیشن انیشیٹو کا حوالہ دیتے ہوئے کہا، ہم ان مصدقہ رپورٹس کا جائزہ لے رہے ہیں کہ آئی پی سی نے حال ہی میں قحط کی تعریف میں تبدیلی کی ہے،” انٹیگریٹڈ فوڈ سیکیورٹی فیز کلاسیفیکیشن انیشی ایٹو (آئی پی سی) نگراں اداروں کا ایک اتحاد ہے جسے اقوامِ متحدہ نے آنے والے بحرانوں سے خبردار کرنے کا کام سونپا ہے۔محکمہ خارجہ کے اہلکار نے مزید کہا، ہم برابر اس بات سے واقف ہیں کہ حماس منظم طریقے سے اسرائیل پر سیاسی دباؤ ڈالنے کے لیے وسیع پیمانے پر فاقہ کشی کے جھوٹے بیانیے کو دانستہ فروغ دے رہی ہے۔”صدر ڈونلڈ ٹرمپ نے کہا ہے کہ ان کی خارجہ پالیسی کا ایک اہم مقصد غزہ اور یوکرین میں جنگیں ختم کرنا ہے۔محکمہ خارجہ کے اہلکار نے کہا، امریکہ کی توجہ اس بات پر مسلسل مرکوز ہے کہ غزہ میں تنازعہ ختم ہو اور یہ یقینی بنایا جائے کہ حماس دوبارہ کبھی غزہ پر حکومت نہ کرے اور لوگوں کو انتہائی ضروری انسانی امداد کی فراہمی ہو۔ترجمان نے کہا، "صدر ٹرمپ اور سکریٹری روبیو نے ضرورت مند لوگوں تک امداد پہنچانے کو ترجیح دی ہے جبکہ حماس کو امداد کی چوری اور لوٹ مار سے روکنے کے لیے حفاظتی اقدامات پر عمل درآمد کیا ہے۔”اقوامِ متحدہ کا حوالے سے محکمہ خارجہ نے بتایا کہ مئی سے اگست تک غزہ میں خوراک کے تقریباً 57,000 پیلیٹ، 4,083 ٹرک اور 50,000 ٹن سے زیادہ خوراک لوٹ لی گئی۔ ترجمان نے کہا، خوراک غزہ میں جا رہی ہے لیکن ضرورت مند لوگوں تک نہیں پہنچ رہی۔ترجمان نے مزید کہا، "امریکی حکومت غزہ کے لوگوں تک امداد پہنچانے پر توجہ مرکوز کر رہی ہے۔ ان شدید مسائل کے حل کا مطلب ہے ایمانداری سے غزہ کے لوگوں کے لیے مسائل حل کرنا جو بہتر سلوک کے مستحق ہیں، نہ کہ لفظی بیانات میں مشغول ہونا۔