حیدرآباد، ( یو این آئی) راجستھان رائلز کے خلاف سن رائزرز حیدرآباد کی 57 رنز سے شاندار جیت کے بعد، نوجوان گیند بازوں ثاقب حسین اور پرفل ہنگے کی کارکردگی موضوعِ بحث بنی ہوئی ہے۔ سابق کرکٹر عرفان پٹھان نے ایک پروگرام میں گفتگو کرتے ہوئے ان نوجوانوں کے اثر اور ان کی جدوجہد پر روشنی ڈالی۔عرفان پٹھان نے ثاقب حسین کی کارکردگی کی تعریف کرتے ہوئے ان کے ماضی کا ایک جذباتی پہلو شیئر کیا۔ انہوں نے بتایا”ثاقب کا یہاں تک پہنچنے کا سفر بے حد متاثر کن ہے۔ ان کی والدہ نے ثاقب کے لیے پہلے کرکٹ جوتے خریدنے کی خاطر اپنے زیورات فروخت کر دیے تھے۔ آج انہیں اتنے بڑے اسٹیج پر پرفارم کرتے دیکھنا ان کے خاندان کے لیے بہت فخر کا مقام ہے۔”عرفان کے مطابق، ثاقب کی کلائی کی پوزیشن انہیں خشک وکٹ پر بھی تیز ٹرن اور دھوکہ دہی پر مبنی ‘سلو بالز پھینکنے میں مدد دیتی ہے، جو مڈل اوورز میں میچ پر گرفت مضبوط بناتی ہے۔عرفان پٹھان نے مزید کہا کہ سن رائزرز حیدرآباد کو جس رفتار اور تغیر کی ضرورت تھی، وہ پرفل اور ثاقب نے فراہم کی ہے۔ پرفل ہنگے نے نئی گیند کے ساتھ اپنی رفتار اور باؤنس سے حریف بلے بازوں کو پریشان کیا، جبکہ ثاقب نے پرانی گیند کے ساتھ اپنی ورائٹی کا جادو دکھایا۔ اس نوجوان جوڑی نے تجربہ کار بالرز جیسے جے دیو نادکت اور ہرشل پٹیل کے ساتھ مل کر حیدرآباد کے اٹیک کو مکمل بنا دیا ہے۔
