ماہ اکتوبر سے قبل جموں کشمیر کا ریاستی درجہ بحال کئے جانے کا امکان

اعجاز ڈار
سرینگر ،سماج نیوز سروس: ماہ اکتوبر سے قبل جموں کشمیر کا ریاستی درجہ بحال کئے جانے کا امکان ظاہر کرتے ہوئے مرکزی وزیر مملکت برائے سوشل جسٹس و ایمپاورمنٹ رام داس اتھاوالے نے کہا کہ جموں کشمیر کے حالات بالکل پُر سکون ہے اور جلد ہی اسمبلی انتخابات ہونگے ۔ تفصیلات کے مطابق دورے سرینگر کے دوران ایک پریس کانفرنس سے خطاب کرتے ہوئے مرکزی وزیر مملکت برائے سوشل جسٹس و ایمپاورمنٹ رام داس اتھاوالے نے کہا کہ جموں کشمیر کے حالات بالکل پُر سکون ہے ۔ انہوں نے کہا کہ جموں کشمیر میں قانون ساز اسمبلی کے انتخابات بھی اکتوبر میں ہو سکتے ہیں۔انہوں نے کہا ’’مہاراشٹر، جھارکھنڈ اور چھتیس گڑھ میں اکتوبر سے پہلے انتخابات ہونے والے ہیں۔ میرے خیال میں اکتوبر سے پہلے ریاست کا درجہ بحال ہو سکتا ہے اور اکتوبر میں الیکشن بھی ہو سکتے ہیں۔‘‘ اس دوران انہوں نے لوگوں سے ووٹنگ کے دوران ریکارڈ ڑ ٹرن آؤٹ کو یقینی بنانے کی اپیل کی ہے ۔ انہوں نے دہرایا کہ وزیر داخلہ نے دفعہ 370 کی منسوخی کے وقت اعلان کیا تھا کہ اسمبلی انتخابات اور ریاست کا درجہ بحال کیا جائے گا۔انہوں نے لوک سبھا میں زیادہ ووٹ ڈالنے کی ستائش کی اور جمہوریت کو مضبوط کرنے کیلئے لوگوں کی ستائش کی۔ سرینگر میں لیفٹنٹ گورنر منوج سنہا کے ساتھ اپنی آدھے گھنٹے کی ملاقات کے بارے میں بات کرتے ہوئے اٹھاولے نے کہا کہ دفعہ 370 کی منسوخی کے بعد سے سیاحت کو فروغ ملا ہے۔انہوں نے مزید کہا ’’غیر ملکیوں سمیت 2.11 کروڑ سے زیادہ سیاح یہاں آئے ہیں۔ لوگ اب کشمیر جانے سے نہیں ڈرتے۔ پہلے وہ آنا چاہتے تھے لیکن دہشت گردی انہیں یہاں آنے سے روک رہی تھی۔ اب ایل جی نے مجھے بتایا کہ کچھ ناخوشگوار واقعات کے درمیان امن قائم ہے‘‘۔ان کے مطابق، انہوں نے جموں و کشمیر میں ایس سی کو 2 لاکھ سے زیادہ پری اور پوسٹ میٹرک اسکالرشپس اور 84000 سے زیادہ او بی سی طلباء کو وظائف دیے ہیں۔ انہوں نے مزید کہا’’جموں و کشمیر میں ایس سی اور او بی سی 8 فیصد ہیں، لیکن کشمیر میں ایک بھی ایس سی خاندان نہیں ہے‘‘۔مرکزی وزیر نے کہا کہ ایس سی اور او بی سی کے خلاف مظالم ایکٹ کے تحت 74 مقدمات درج کیے گئے ہیں۔ انہوں نے کہا ’’ ہم ہر ضلع میں ایک اولڈ ایج ہوم شروع کرنے کا منصوبہ بنا رہے ہیں۔ فی الحال، ہمارے پاس جموں و کشمیر میں 16 اولڈ ایج ہوم ہیں۔ ‘‘ وزیر نے کہا کہ ان کی پارٹی ریپبلکن پارٹی آف انڈیا جموں و کشمیر قانون ساز اسمبلی کے انتخابات میں کم از کم 10سے 15 امیدوار کھڑے کرے گی۔