اسلام آباد :پاکستان میں حکام کم از کم 16 لاکھ افراد کو شدید سیلاب سے بچانے کے لیے ہر ممکن اقدامات کرنے میں مصروف ہیں۔ دریاؤں میں مسلسل طغیانی کے باعث پانی دیہاتوں میں داخل ہو رہا ہے۔ یہ بات بدھ کو حکام اور اقوامِ متحدہ نے بتائی۔قدرتی آفات سے نمٹنے کی قومی ایجنسی کے مطابق دریاؤں میں پانی کی سطح بلند ہونے، شدید بارشوں سے آنے والے تباہ کن سیلاب اور گلیشیائی جھیلوں کے پھٹنے سے پیدا ہونے والی تودے گرنے کی صورتِ حال کے نتیجے میں جون سے اب تک 928 افراد جاں بحق ہو چکے ہیں۔اقوامِ متحدہ کے ادارہ برائے آفات کے مطابق اب تک ملک کے شمالی حصے، شمال مغربی پہاڑی علاقے اور وسطی علاقے سمیت لگ بھگ 60 لاکھ افراد سیلاب سے متاثر ہوئے ہیں۔اقوامِ متحدہ کے دفتر برائے رابطہ انسانی امور نے کہا کہ تقریباً 16 لاکھ افراد کو بڑے پیمانے پر آنے والے سیلاب کا خطرہ ہے اور ممکن ہے کہ انھیں منتقل کرنے یا مدد کرنے کی ضرورت پڑے، کیونکہ دریاؤں میں آنے والا سیلاب اب جنوبی صوبہ سندھ تک جا پہنچا ہے۔سندھ کے وزیر اعلیٰ مراد علی شاہ نے کہا ہے کہ "ہم نے تقریباً دو لاکھ افراد کو دریاؤں کے کنارے سے منتقل کیا ہے اور مزید لوگوں کو بچانے کے لیے تیار ہیں۔”کراچی میں بارشوں کے نتیجے میں ہونے والی اموات کی تعداد 7 ہوگئی، گزشتہ دو روز کے دوران وقفے وقفے سے مسلسل بارش نے تباہی مچا دی، ملیر اور لیاری کی ندیاں دریاؤں میں تبدیل ہوگئیں، نشیبی علاقے ڈوب گئے، میئر کی درخواست پر چیف سیکریٹری سندھ نے فوج طب کرلی، شہر کے بعض علاقوں میں سیلابی صورتحال کے باعث ریسکیو 1122، پاک فوج اور رینجرز کی ٹیموں نے سیکڑوں شہریوں کو ریسکیو کیا۔تفصیلات کے مطابق ریسیکیو سروسز نے بتایا ہے کہ آج شہر میں بارش کے نتیجے میں ہونے والے مختلف واقعات میں مزید تین افراد جان کی بازی ہار گئے، جس کے بعد گزشتہ روز سے اموات کی تعداد بڑھ کر 7 ہوگئی، جبکہ تین افراد لاپتا ہیں۔ایدھی ریسکیو اہلکاروں نے گڈاپ ٹاؤن میں کونکر ندی میں گری ایک کار میں سے ایک مرد اور ایک خاتون کی لاشیں برآمد کیں۔ ایدھی فاؤنڈیشن کے جاری کردہ بیان کے مطابق جاں بحق ہونے والوں کی شناخت 60 سالہ نبو گلاب اور 45 سالہ جاوید شاہ سے ہوئی ہے۔علاوہ ازیں پولیس سرجن ڈاکٹر سمعیہ سید نے ڈان کو بتایا کہ 18 سالہ نوجوان احمد قادر کی لاش عباسی شہید اسپتال لائی گئی۔ انہیں نارتھ ناظم آباد بلاک سی سے منتقل کیا گیا تھا، جہاں وہ کرنٹ لگنے سے جاں بحق ہوگئے۔ریسکیو 1122 کے جاری کردہ بیان کے مطابق ملیر ندی میں 2 افراد کے لاپتا ہونے کے بعد ایک شخص کو زندہ بچا لیا گیا۔
