واشنگٹن (ہ س)۔ امریکی صدر ڈونالڈ ٹرمپ نے فلپائن سمیت چھ اور ممالک پر بھاری درآمدی ڈیوٹی عائد کرنے کا اعلان کیا ہے۔ بدھ کے روز ان ممالک کے رہنماوں کو بھیجے گئے رسمی خطوط میں ٹرمپ نے کہا کہ یکم اگست سے نافذ ہونے والے اس ٹیرف میں لیبیا، عراق اور الجزائر سے درآمدات پر 30 فیصد، مالدووا اور برونیئی پر 25 فیصد اور فلپائن پر 20 فیصد ڈیوٹی لگائی جائے گی۔ اس اقدام سے رواں ہفتے نئے ٹیرف کی شرح سے متاثر ہونے والے ممالک کی تعداد 20 ہو گئی ہے۔ اس سے قبل ٹرمپ انتظامیہ نے کمبوڈیا، تھائی لینڈ، بنگلہ دیش، انڈونیشیا، جاپان اور جنوبی کوریا سمیت کئی ممالک پر بھی ٹیرف بڑھانے کا اعلان کیا تھا۔ ٹرمپ نے کابینہ کے اجلاس میں واضح کیا کہ یکم اگست کی ڈیڈ لائن حتمی ہے اور ان ٹیرف پر مزید بات چیت کی کوئی گنجائش نہیں ہے۔ حالانکہ انہوں نے یہ بھی کہا کہ اگر کوئی ملک مذاکرات کرنا چاہتا ہے تو وہ یکم اگست سے پہلے کسی معاہدے پر پہنچ سکتے ہیں۔ساتھ ہی ٹرمپ نے اپنے خط میں وارننگ بھی دی کہ جتنا وہ (دوسرے ممالک) اپنے ٹیرف میں اضافہ کریں گے، اتنا ہی ہم اپنے ٹیرف میں اضافہ کریں گے۔قابل ذکر ہے کہ اس سال اپریل میں ٹرمپ انتظامیہ نے نام نہاد ’’رسیپروکل ٹیرف‘‘ کا اعلان کیا تھا، جسے 90 دنوں کے لیے ملتوی کر دیا گیا تھا۔ 7 جولائی کو دستخط کیے گئے ایگزیکٹو آرڈر کے مطابق یہ اب یکم اگست سے نافذ ہوں گے، سوائے ان ممالک کے جن کے امریکہ کے ساتھ براہ راست تجارتی معاہدے ہیں۔ ابھی تک، امریکہ کے برطانیہ اور ویتنام کے ساتھ تجارتی معاہدے ہیں اور چین کے ساتھ ایک فریم ورک معاہدہ ہے، جس سے ان ممالک کو فی الحال ٹیرف میں راحت ملی ہے۔
