کیف(ہ س)۔یوکرینی صدر ولودی میر زیلنسکی نے اعلان کیا ہے کہ ان کے ملک نے منگل کے روز اپنا پہلا فرانسیسی لڑاکا طیارہ … میراج 2000، ایک حادثے میں کھو دیا … تاہم پائلٹ طیارے سے بحفاظت چھلانگ لگانے میں کامیاب ہو گیا۔زیلنسکی نے بدھ کی صبح صدارتی ویب سائٹ پر نشر کیے گئے خطاب میں کہا افسوس کے ساتھ کہنا پڑتا ہے کہ ہم اپنے ایک لڑاکا طیارے سے ہاتھ دھو بیٹھے ہیں۔ یہ فرانسیسی ساختہ، نہایت مؤثر، ہمارے میراج طیاروں میں سے ایک تھا۔انہوں نے اس بات کی تصدیق کی کہ طیارے کو روسی افواج نے نہیں گرایا، اور پائلٹ نے بحفاظت چھلانگ لگا لی۔یوکرینی فضائیہ نے اپنی جانب سے تصدیق کی کہ یہ حادثہ منگل کی شام پیش آیا اور اس سے زمین پر کوئی جانی نقصان نہیں ہوا۔فضائیہ کے جاری کردہ بیان میں کہا گیا ہے”پائلٹ نے پرواز کنٹرولر کو طیارے کے آلات میں خرابی کی اطلاع دی۔ اس کے بعد اْس نے ہنگامی حالات میں متوقع پیشہ ورانہ طریقے سے عمل کیا اور کامیابی سے پیراشوٹ کے ذریعے چھلانگ لگا دی۔فرانسیسی خبر رساں ادارے فرانس پریس کے مطابق یہ لڑاکا طیارے داسو ایوی ایشن کمپنی کی تیار کردہ ہیں، اور ان پر کام کرنے کے لیے یوکرینی پائلٹس اور مکینکس کو مشرقی فرانس میں تربیت دی گئی تھی۔ یوکرین نے یہ طیارے رواں سال کے آغاز میں فرانس کی جانب سے دی جانے والی فوجی امداد کے تحت حاصل کرنا شروع کیے تھے، تاکہ روسی حملوں کا مقابلہ کیا جا سکے۔
