کشن گنج (پریس ریلیز) امارت پبلک اسکول کے زیرِ اہتمام کمیونٹی ہال کشن گنج میں ایک عظیم الشان اجلاسِ عام کا انعقاد کیا گیا، جس کی صدارت حضرت امیرشریعت، مفکر ملت حضرت مولانا سید احمد ولی فیصل رحمانی (سجادہ نشین خانقاہِ رحمت مونگیر) نے فرمائی۔حضرت امیرِ شریعت نے اپنے تفصیلی خطاب میں تعلیم کی اہمیت پر زور دیتے ہوئے فرمایا کہ تعلیم ہی وہ بنیادی ستون ہے جس پر قوموں کی ترقی اور خوشحالی کا دارومدار ہوتا ہے۔ انہوں نے کہا کہ موجودہ دور میں صرف دینی تعلیم کافی نہیں بلکہ دینی تعلیم کے ساتھ عصری تعلیم بھی نہایت ضروری ہے، تاکہ نئی نسل علم کے ساتھ ساتھ دین و اخلاق سے بھی وابستہ رہے انہوں نے افسوس کا اظہار کرتے ہوئے کہا کہ آج ہم اپنے بچوں کے مستقبل کے لیے دنیاوی تعلیم پر توجہ دیتے ہیں، مگر ان کے دین و ایمان کی فکر سے غافل ہو جاتے ہیں۔ مزید فرمایا کہ اسلام محض ایک مذہب نہیں بلکہ مکمل ضابطۂ حیات ہے، اس لیے ہمیں اپنی زندگی کے ہر شعبے میں سنتِ نبوی ﷺ کو اپنانا چاہیے۔ انہوں نے شادی بیاہ کے مواقع پر فضول خرچی اور اسراف سے بچنے کی تلقین کرتے ہوئے سادگی کو فروغ دینے پر زور دیا ۔حضرت مولانا مفتی سعید الرحمن قاسمی (ناظمِ اعلیٰ امارت شرعیہ، بہار، اڑیسہ و جھارکھنڈ، پھلواری شریف پٹنہ) نے اپنے خطاب میں کہا کہ تعلیم ترقی کی شاہ کلید ہے اور جو قوم تعلیم کو اپنائے گی وہی کامیابی سے ہمکنار ہوگی۔ انہوں نےوالدین کو نصیحت کی کہ وہ اپنے بچوں کو عصری تعلیم کے ساتھ دینی تعلیم سے بھی آراستہ کریں ساتھ ہی جہیز جیسی سماجی برائی کے خاتمے پر زور دیتے ہوئے کہا کہ بیٹیوں کو جہیز کے بجائے تعلیم سے آراستہ کریں، نکاح کو آسان بنائیں اور شادی بیاہ میں فضول خرچی سے مکمل پرہیز کریں مولانا حکیم الدین قاسمی (جنرل سکریٹری، جمعیۃ علماء ہند) نے نوجوان نسل میں بڑھتے ہوئے نشہ اور منشیات کے رجحان پر تشویش ظاہر کرتے ہوئے اس کے سدباب کے لیے سنجیدہ اقدامات کی اپیل کی مفتی جاوید احمد قاسمی (صدر، جمعیۃ علماء ہند بہار) نے تعلیم کی اہمیت پر روشنی ڈالتے ہوئے کہا کہ موجودہ دور میں دینی و دنیاوی دونوں علوم کا حصول نہایت ضروری ہے۔ انہوں نے سیاسی بصیرت و حکمت اپنانے اور تجارت و تعلیم کو مضبوطی سے اختیار کرنے کی تلقین کی۔مولانا غیاث الدین قاسمی نے امارت پبلک اسکول کے بچوں کے پروگرام کو سراہتے ہوئے کہا کہ ایسے ادارے آنے والی نسلوں کے دین و ایمان کی حفاظت کے لیے نہایت ضروری ہیں اختر الایمان (ایم ایل اے) نے کہا کہ امارت کی جانب سے اس علاقے میں اسکول کا قیام قابلِ تحسین قدم ہے۔ انہوں نے امارت اور امیرِ شریعت کا شکریہ ادا کرتے ہوئے سیمانچل میں تعلیمی بیداری کی کوششوں کو سراہا اور بیٹیوں کی تعلیم و اخلاقی تربیت پر زور دیا جناب قمر الہدیٰ (ایم ایل اے) نے کہا کہ والدین کی ذمہ داری ہے کہ وہ اپنی بچیوں کی حفاظت کے ساتھ ان کی دینی و اخلاقی تربیت پر خصوصی توجہ دیں، تاکہ ان کے دلوں میں دین کی اہمیت پیدا ہو مولانا محمد ابوالکلام شمسی معاون ناظم امارت شرعیہ پھلواری شریف پٹنہ نے امارت شرعیہ کی خدمات اور امارت پبلک اسکول کے قیام کے پس منظر پر روشنی ڈالتے ہوئے کہا کہ یہ ادارے ملت کے روشن مستقبل کی ضمانت ہیں پروگرام کے دوران اسکول کے بچوں نے بہترین تعلیمی و ثقافتی پروگرام پیش کیے، جنہیں حاضرین نے بے حد سراہا۔ معزز مہمانوں کی خدمت میں سپاس نامہ بھی پیش کیا گیا پروگرام کا آغاز قاری ریحان کی تلاوتِ کلامِ پاک سے ہوا، جبکہ نظامت کے فرائض قاضی ارشد قاسمی (قاضی شریعت کشن گنج) نے انجام دیے مولانا خالد مولانا فیض الرحمن مفتی مناظر سمیت دیگر علماء نے بھی خطاب کیا آخر میں حضرت امیرِ شریعت کی دعا پر پروگرام کا اختتام ہوا پروگرام سے قبل حضرت امیرِ شریعت نےامارت پبلک اسکول کا معائنہ بھی کیا، تعلیمی نظام کا جائزہ لیا اور اساتذہ سے تبادلۂ خیال کیا اس موقع پر مولانا انوار صاحب رحمانی (ناظم دارالعلوم بہادر گنج) نے بھی حضرت امیرِ شریعت سے ملاقات کی ،پروگرام کوکامیاب بنانے میں حاجی مسلم صاحب کی قیادت میں مولانا محمد ابوالکلام شمسی معاون ناظم امارت شرعیہ قاضی ارشد قاسمی قاضی شریعت کشن گنج مولانا طارق قاسمی نائب قاضی شریعت کشن گنج مولانا عباس مبلغ امارت شرعیہ عفان صاحب سمیت علاقہ کے ائمہ وعلماء نے اہم کردار ادا کیا۔
