واشنگٹن کی گرین لینڈ کے حوالے سے انٹیلی جنس معلومات جمع کرنے کی کوششیں تیز

واشنگٹن (ہ س)۔امریکہ نے گرین لینڈ سے متعلق انٹیلی جنس معلومات جمع کرنے کی کوششیں تیز کر دی ہیں۔ یہ پیش رفت صدر ڈونلڈ ٹرمپ کی اس جزیرے کو حاصل کرنے کی مہم سے … امریکی جاسوسی اداروں کی بھی وابستگی ظاہر کر رہی ہے۔ یہ بات اس معاملے سے با خبر دو افراد نے امریکی اخبار وال اسٹریٹ جرنل کو بتائی۔ذرائع کے مطابق، ڈائریکٹر نیشنل انٹیلی جنس ٹلسی گیبارڈ کی نگرانی میں متعدد اعلیٰ سطحی اہل کاروں نے گذشتہ ہفتے انٹیلی جنس ایجنسیوں کے سربراہان کو ایک "اجتماعی خط” جاری کیا تھا۔ پیغام میں گرین لینڈ کی آزادی کی تحریک اور وہاں امریکی وسائل کے ممکنہ استعمال کے بارے میں مزید جاننے کی ہدایت دی گئی۔یہ خفیہ پیغام جاسوسی، مواصلات کی نگرانی اور زمینی ایجنٹوں پر مشتمل ایجنسیوں کو یہ ذمہ داری سونپتا ہے کہ وہ گرین لینڈ اور ڈنمارک میں ان افراد کی نشان دہی کریں جو امریکہ کے مفادات کی حمایت کرتے ہیں۔اخبار کے مطابق، یہ ہدایت امریکی صدر ٹرمپ کی جانب سے گرین لینڈ کو حاصل کرنے کی خواہش کے حوالے سے اٹھایا گیا ایک عملی قدم ہے۔ اس خط کی مدد سے انٹیلی جنس ایجنسیوں کی ترجیحات طے کرنے اور وسائل کو اہم اہداف کی طرف موڑنے میں مدد ملے گی۔یہ ہدایت، جسے سی آئی اے، ڈیفنس انٹیلی جنس ایجنسی اور نیشنل سیکیورٹی ایجنسی جیسے اداروں کو بھیجا گیا، وائٹ ہاؤس کے گرین لینڈ پر کنٹرول حاصل کرنے کے عزم کو ظاہر کرتی ہے۔ گرین لینڈ خود مختار حیثیت رکھنے والا خطہ ہے، مگر یہ ڈنمارک کا حصہ ہے، جو نیٹو کا رکن اور امریکہ کا دیرینہ اتحادی ہے۔وائٹ ہاؤس کے نیشنل سیکیورٹی کونسل کے ترجمان جیمز ہیویٹ کا کہنا ہے کہ وہ انٹیلی جنس امور پر تبصرہ نہیں کرتے، تاہم انھوں نے واضح کیا کہ امریکہ کو گرین لینڈ اور آرکٹک کی سلامتی پر تشویش ہے۔دوسری جانب، ٹلسی گیبارڈ نے اپنے بیان میں وال اسٹریٹ جرنل کو تنقید کا نشانہ بناتے ہوئے کہا کہ اخبار نے انٹیلی جنس معلومات کو سیاسی رنگ دے کر "ڈیپ اسٹیٹ” عناصر کی مدد کی ہے جو صدر کو نقصان پہنچانا چاہتے ہیں۔ انہوں نے کہا کہ یہ عناصر نہ صرف قانون کی خلاف ورزی کر رہے ہیں بلکہ قومی سلامتی اور جمہوریت کو بھی کمزور کر رہے ہیں۔یاد رہے کہ اپنی پہلی مدت صدارت کے دوران صدر ٹرمپ نے کھل کر یہ خواہش ظاہر کی تھی کہ وہ 8 لاکھ 36 ہزار مربع میل پر پھیلے اس جزیرے کو خریدنا یا اس پر امریکی کنٹرول حاصل کرنا چاہتے ہیں۔ اس پر ڈنمارک اور گرین لینڈ کے عوام کی جانب سے سخت ناراضی کا اظہار کیا گیا تھا۔