ڈھاکہ، ( یو این آئی)نیوزی لینڈ کرکٹ ٹیم کے قائم مقام کپتان ٹام لیتھم نے بنگلہ دیش کے خلاف ون ڈے سیریز کے آغاز سے قبل اپنے پختہ عزم کا اظہار کرتے ہوئے کہا ہے کہ اگرچہ ان کی ٹیم ناتجربہ کار ہے، لیکن ان کا واحد مقصد میزبان ٹیم کو ان کے ہوم گراؤنڈ پر شکست دے کر سیریز جیتنا ہے۔شیرِ بنگلہ نیشنل اسٹیڈیم میرپور میں پریس کانفرنس کرتے ہوئے لیتھم نے واضح کیا کہ بنگلہ دیشی کنڈیشنز میں کھیلنا ہمیشہ سے ایک چیلنج رہا ہے، لیکن ان کی ٹیم اس کے لیے تیار ہے۔نیوزی لینڈ نے اس سیریز کے لیے اپنے کئی اہم کھلاڑیوں کو آرام دے کر ایک دوسرے درجے کی ٹیم میدان میں اتاری ہے، جس میں اکثر کھلاڑی پہلی بار بنگلہ دیش کی پچوں پر کھیلیں گے۔ ٹام لیتھم نے اس حوالے سے کہا”ہمارا ہدف واضح ہے کہ ہم یہاں سیریز جیتنے آئے ہیں۔””ہمارے پاس کچھ ایسے کھلاڑی ہیں جنہیں ان کنڈیشنز کا تجربہ کم ہے، لیکن جتنا زیادہ وہ یہاں کھیلیں گے، اتنا ہی ان کے کھیل میں بہتری آئے گی۔انہوں نے مزید کہا کہ بطور سینئر کھلاڑی، یہ ان کی اور ہنری نکولس جیسے تجربہ کار کھلاڑیوں کی ذمہ داری ہے کہ وہ جونیئرز کی رہنمائی کریں۔بنگلہ دیش اور نیوزی لینڈ کے درمیان حالیہ برسوں میں رقابت دلچسپ رہی ہے۔ بنگلہ دیش نے 2010 میں نیوزی لینڈ کو 4-0 اور 2013 میں 3-0 سے کلین سویپ کر کے دنیا کو حیران کر دیا تھا۔ 13 سال کے طویل انتظار کے بعد، 2023 میں کیوی ٹیم نے بنگلہ دیش کو ان کے گھر میں 2-0 سے شکست دے کر اپنی برتری دوبارہ ثابت کی تھی۔ٹام لیتھم نے تسلیم کیا کہ بنگلہ دیش اب صرف اسپن پر انحصار نہیں کرتا بلکہ ان کا فاسٹ بولنگ اٹیک بھی انتہائی خطرناک ہو چکا ہے۔ انہوں نے پاکستان کے خلاف بنگلہ دیش کی حالیہ 2-1 سے فتح کا حوالہ دیتے ہوئے کہا”ناہید رانا، تسکین احمد اور مستفیض الرحمان جیسے بولرز نے خود کو ثابت کیا ہے۔ ہمیں ہر طرح کی صورتحال اور بولنگ کے لیے تیار رہنا ہوگا۔کیوی کپتان کے مطابق ڈھاکہ کی تپتی گرمی اور اسپن کے لیے سازگار پچیں ان کے کھلاڑیوں کا اصل امتحان لیں گی۔ انہوں نے کہا کہ ٹیم نے پاکستان اور بنگلہ دیش کے حالیہ میچوں کی ویڈیوز دیکھ کر اپنی حکمت عملی تیار کی ہے اور وہ ہر طرح کی سطح پر خود کو ڈھالنے کی کوشش کریں گے۔اس سیریز کا پہلا میچ کل میرپور میں کھیلا جائے گا، جہاں نیوزی لینڈ کی نوجوان ٹیم بنگلہ دیشی ٹائیگرز کے سامنے اپنی صلاحیتوں کا لوہا منوانے کی کوشش کرے گی۔
