بھوپال، 14 دسمبر (:) مدھیہ پردیش کے وزیر اعلیٰ ڈاکٹر موہن یادو نے عہدہ سنبھالنے کے بعد کئی اہم فیصلے لیے ، جس میں مذہبی مقامات پر بے قابو لاؤڈ اسپیکر پر پابندی کے ساتھ ساتھ ریاست میں کھلے میں گوشت کی فروخت پر بھی پابندی لگا دی گئی ہے ۔کل ہی حلف لینے کے بعد ڈاکٹر یادو نے شام کو وزارت میں چارج سنبھالا تھا۔ انہوں نے چارج سنبھالتے ہی وزراء کی کونسل کی میٹنگ کا اہتمام کیا، جس میں ڈاکٹر یادو کے ساتھ نائب وزیر اعلیٰ جگدیش دیوڑا، راجندر شکلا، ریاستی چیف سکریٹری محترمہ ویرا رانا اور دیگر اعلیٰ افسران موجود تھے ۔اس میٹنگ میں کئی اہم فیصلے لیے گئے ۔ سرکاری معلومات کے مطابق ڈاکٹر یادو کی صدارت میں ہوئی میٹنگ میں عوامی بہبود سے متعلق آٹھ ترجیحی امور پر تبادلہ خیال کیا گیا اور وزیر اعلیٰ ڈاکٹر یادو نے عہدیداروں کو ضروری ہدایات دیں۔
